لاس رسیدونکی لینک

blogs

Friday 15 December 2017

Calendar
December 2017
Sun Mon Tue Wed Thu Fri Sat
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

لومړی ځل دی چې د پاکستان د پوځ مشر جنرال قمر جاوېد باجوه د مدرسو د زده کونکو په مستقبل اندېښنې ښودلې دي. ښاغلي باجوه ويلي دي "زیاتره مدرسې علم دينیات (تیهالوجی) ښايي" هغه تپوس وکړو د تيهالوجي د وئېلو ورستو به د دويي نه څه جوړېږي؟ او بیا یې په خپله ځواب هم اوویلو "یا به ترې ملا جوړېږي یا ترهگر"

د رایټرز خبري ادارې د رپورټ تر مخه جنرال باجوه دا خبرې د بلوچستان صوبې په سر ښار کوټه کې ځلمو ته وکړې.

د پاکستان د پوځ مشر اوویل ملایان خپل هېواد ته څه ورکوي؟ د پوځ د مشر په خیال د دويي په مستقبل کې امکانات څه دي " نو دويي به څه کوي؟ دويي هېواد له څه ورکولی شي"؟ هغه دا هم اوویل چې د مدرسو په ضد نه دی خو دغلته په ښودونکو درسونو کې بدلون غواړي.

جنرل باجوه وايي چا ورته ويلي دي چې په پاکستان کې د ۲۵ لاکو نه زیات د مدرسو زده کوونکي دي.

په پاکستان کې دا وخت د اتحاد تنظيم مدارس د انتظام لاندې ٣٥٣٣٧ ر جسټرډ، ثبت مدرسې دي. د غیر رجسټرډ شوو شمېر نه دی مالوم، د اندازو په بنسټ د ثبت او نا ثبت شوو شمېر د رسمي شمېرې نه څو زره زیات کیدې شي. په رجسټرډ شوو کې تر ټولو زیاتې مدرسې د سخت دريځو دیوبندي مسلک د مننونکو دي. د بریلوي، اهل حديث، شیعه مسلک مننونکو مدرسې هم په گڼ شمېر کې دي.

په پاکستان کې چې د مدرسو نه طالبعلمان سبقونه پوره کړي نو بیا اکثره په جماعتونو کې امامتي کوي او ديني درسونه ورکوي. خو په دغه جماعتونو کې د دويي څه تړلی امدن نه وي. دويي ته په جماعتونو کې د امامت نقدې تنخواگانې نه ورکول کیږي. دويي ته د خپل خدمت په بدل کې د کلي خلق په فصل کې څه برخه ورکوي. ملایانو ته خلق د جنازو، نکاح تړلو، سنتونو کولو، تراويحو کولو او دم درود لپاره هم نقدې ورکوي او د لوی اختر د قربانو څرمنې هم په زیاترو سیمو کې ملایانو ته ورکول کیږي.

څیړونکي او د پاکستان په مدرسو نظر لرونکي ځيني لیکوالان وايي په پاکستان کې د دينی مدرسو د سوا کیدلو یو علت دا دی چې دويي ديني تعليمات ویړیا ښايي او زدکونکو ته ویړیا خوراک او داستوگنې ځای ورکوي. بل علت دا دی چې په پاکستان کې د عصري زدکړو مرکزونه کم یا غیر معیاري دي. په شخصي میدان کې د سکولونو شمېره سوا ده خو هلته د تعليم کول د هر چا د وس خبره نه ده .

د ملگرو ملتونو ادارې یو این ډي پي او د پاکستان د حکومت یو شريک رپورټ ترمخه په لسو کې څلور پاکستانیان د بې وځلۍ د ليکې نه لاندې ژوند تېروي.

د پاکستان د تعليمي شمېرو اداره نیشنل ایجیوکېشن مېنېجمینټ انفارمېشن سسټم د کال ٢٠١٧ په رپورټ کې وايي په پاکستان کې د سکول نه بهر د ماشومانو شمېره ٢٢.٦ میلینه ده .د تر هگرۍ د لاسه تر ټولو زیاته اغیزمنه په خېبر پښتونخوا صوبه کې 1.5 میلین او په فاټا کې څه کم اته لکه یعني په ټوله ٢٣ لاکه ماشومان د سکول څخه بهر دي.

په پاکستان کې د پوهنې د څارنې یوه خپلواکه اداره انډیپینډینټ مانیټورینگ یونټ وايي په خېبر پښتونخوا کې ١١ فیصده سکولونه اوس هم چاردیواري نه لري. دغلته دماشومانو په خاصه توگه د جينکو چارچوبۍ نشته دی.

د تعليم د پرمختگ او د حکومتي چارو د څارنې پاکستانۍ ادارې الف اعلان یو چارواکي عمر اورکزي ويلي دي په پښتونخوا، بلوچستان او فاټا کې د نور پاکستان په پرتله د تعليم حال ډېر خراب دی.

په پاکستان کې د ډیر وخت راهسې په دیني مدرسو کې د اصلاحاتو خبره کیږي او بنیادي مقصد يې دا ویل کیږي چې مدرسې دې په نصاب کې هم عصري سبقونه شامل کړي. د پاکستان د حکومت دريځ دی د اصلاحاتو دلارې حکومت په مدرسو خپل نظر هم زیاتول غواړي خو مدرسې تر اوسه بدلون منلو ته تیارې نه ښکاري.

د پاکستان د لویې پنجاب صوبې سیاست مدار او پخوا درې ځله وزيراعظم پاتي شوي نواز شريف د پښتون ملت پال مشر عبدالصمد خان اڅکزي (خان شهيد) د نظریې، ارمانونو او مبارزې ستاینه کړې ده.

ښاغلي شريف ويلي دي د هغه د گوند مسلم ليگ نون او د خان شهيد د جوړ کړي گوند پښتونخوا ملي پارټۍ په خپلو کې کلکه نظریاتي ملگرتیا ده. دانگرېزۍ ژبې د ورځپاڼې اېکپرېس ټريبون ترمخه نوازشريف ويلي دي:

" پاکستان مسلم ليگ نون او پښتونخوا ملي گوند په نظریاتي توگه یو بل سره تړلې شوي دي"

ښاغلي شريف دغه شان ستاینه پخوا د یو بل پښتون ملت پالي مشر ارواښاد عبدالولي خان او د هغه دځوي اسفندیار ولي خان هم کړې وه.

د ښاغلي شريف گوند مسلم ليگ نون او عوامي نیشنل گوند د لس اتیایم په لسيزه کې حکومتي ایتلافیان وو. څو میاشتې د مخه د نواز شريف خلاف د عدالتي پلټنو په وخت د ای این پي اوسني مشر اسفندیار ولي خان په خپله یوه وینا کې ويلي وو:

"زه د نواز شريف سره ولاړ یم او د چا پلار یې هم نه د حکومت څخه نشي ویستلی"

ښاغلي نواز شريف نن د بلوچستان صوبې په سر ښار کوټه کې د خپل ایتلافي پښتونخوا ملي گوند په سیاسي جلسه کې محمود خان اڅکزي ته ډاډ ورکړو چې په هر پړاو کې به یې ملاتړ کوي.

د نن دا جلسه د پښتنون ملت پال مشر خان شهيد د ۴۴م تلين په مهال جوړه شوې وه.

د ورځپاڼې ډان د خبر تر مخه پخواني وزيراعظم اوویل صمد خان غوښتل چې په پاکستان کې د افغانستان په څېر سړکونه وویني، نوازشريف دعوا وکړه د صمد خان دغه ارمان یې پوره کړی دی:

" اوس د بلوچستان سړکونه او موټر وې له افغانستان څخه غوره دي"

ښاغلي شريف په کوټه کې د وینا په وخت د ښاغلي خان د قربانیو ستاینه هم وکړه:

"پښتون ملت پال مشر ډېرې قربانۍ ورکړي دي او د خپلې مفکورې لپاره یې ۲۴ کاله په زندان کې تېر کړی دي".

خان شهيد زیاتره زندانونه په پاکستان کې تېر کړي دي او اخبار استقلال ورله هم د پاکستان حکومت تړلی ؤ.

د پاکستان په سیاست کې ډېرې کمې داسې شيبې راځي چې د پنجاب صوبې کوم سیاست مدار د یو پښتون، بلوڅ یا سندهي سیاست مدار مفکوره او سیاسي مبارزه ستايي.

په تاريخي توگه د پنجاب او پاتې درې صوبو پښتونخوا، سنده او بلوچستان په اکثرو ملي او سيمه ایزو مسلو بیل بیل دريځونه پاتې شوي دي. لکه په اوسني وخت کې د چين پاکستان اقتصادي لاره— سي پېک او د قامي وسیلو د وېش مسله او یا په پخواني وختونو کې صوبو له د اختیار ورکولو او د کالاباغ ډېم مسلې یې غټ مثالونه دي.

خو د پاکستان په اوسنۍ سیاسي بې قرارۍ کې د نوازشريف د خلې څخه د خان شهيد ستایل څه ډېره ناشونې هم نه ښکاري.

ددې یو علت دا کېدې شي چې دا وخت د پنجاب سیاستمدار نواز شريف په خپل هېواد کې د ځان نه هم د زورَورو سره په ډغره ورتلو مجبوره شوی دی.

ښاغلی شريف د هېواد ستر عدالت نا اهله کړی دی او اوس دی اولس ته په جلسو کې وايي عدالت ورسره بې انصافي کړې ده، ښاغلي شريف د پوځ سره خپل اختلافونه په ډاگه څرگند کړي دي، او د هېواد تر ټولو زیات طاقتور خلک مذهبي سخت دريزان یې په ضد ولاړ دي.

بل علت یې دا کېدی شي چې د ښاغلي نواز شريف او د ښاغلي محمود خان اڅکزي زړه ملگرتیا ده، دواڼه د خپلو گوندونو مشران دي او په تېرو وختونو کې ایتلافیان پاتې شوي دي. ښاغلی اڅکزی د پخواني پوځي آمر پروېز مشرف په خلاف هم د نواز شريف ملگرتیا کړې وه.

د دواڼو مشرانو د گوندونو دا وخت په بلوچستان صوبه کې شريک حکومت هم دی چې د ښاغلي اڅکزي یو ورور ډاکټر حامد اڅکزی په کې د پلان او پرمختیا وزير دی او بل ورور محمد خان د صوبې گورنر دی.

ښاغلي اڅکزي نن د کوټه په جلسه کې دنوازشريف مننه وکړه او په خپلو یو شمېر تقريرونو کې یې وړاندې هم ويلي دي د بل هر طاقت په ضد به دنوازشريف سره ولاړ وي.

ښاغلي شريف که نن په کوټه کې پښتون ملت پال مشر خان شهيد و ستایلو نوبیخي رښتیا یې اوویل خو هغه د خپل حکومت په تېرو څلورو کالو کې د پښتنو په سيمو کې د پرمختگ دعوا پښتانه، نه مني.

په پاکستان کې د محمود خان اڅکزي دگوند نه علاوه، عوامي نېشنل گوند، قامي وطن پارټۍ، جماعت اسلامي، پښتون اولسي تحريک او په پښتونخوا صوبه که د واکمن تحريک انصاف مشرانو تل ويلي دي د چين پاکستان اقتصادي لار سي پېک د پاکستان نا بلکې د پنجاب د تقدير د بدلولو منصوبه ده. پښتانه وايي هم د نوازشريف په حکومت کې په دې منصوبه کې د پښتنو برخه پنجاب ته ورکړې شوه.

نور کتل

XS
SM
MD
LG