د افغانستان ملي امنیت وايي، عمر خطاب یا عمر منصور د غزني ولایت په ګیلان ولسوالۍ کې د هوايي او پوځي عملیاتو په ترڅ کې ووژل شو.
واشنګټن پوست ورځپاڼه وايي، (عمر خطاب د پاکستان د قبایلي سیمو اوسېدونکی و چې عمر یې څه باندې ۴۰ کاله)
د ملي امنیت یو چارواکي د خپل نوم نه ښودلو په شرط رسنیو ته ویلي دي چې عمر بن خطاب د ۲۰۰۱ کال راهیسې په افغانستان کې د طالبانو د رژیم له ړنګېدو راوروسته د القاعده شبکې تر ټولو لوړ پوړی مشر و چې ووژل شو.
امریکايي ځواکونو خطاب په هندي نیمه قاره (بر صغیر) کې د القاعده شبکې دوهم نمبر ستر مشر ګڼلی.
دوی ویلي چې خطاب د افغان حکومت او بهرنیو ځواکونو پرضد په مستقیمو عملیاتو کې ښکیل کس وه چې طالبانو ته به یې د شپنیو بریدونو او راکټي بریدونو په برخه کې مشوره ورکوله.
تیر کال هم افغان چارواکو او امریکايي پوځ په افغانستان کې د القاعده شبکې د ګڼو بهرنیو ترهګرو د وژل کېدو راپورونه ورکړي وو.
په افغانستان کې دیره امریکايي ځواکونو هم د سې شنبې په ورځ د خطاب او د القاعده د ګڼو نورو ترهګرو د وژل کېدو خبر تایید کړیدی.
دوي ویلي چې د تېرو څو اونیو په موده کې یې په غزني، پکتیا، او زابل ولایتونو کې ګڼ پوځي عملیات ترسره کړي چې د افغانستان د ملي امنیت د ادارې د معلوماتو پر بنسټ د القاعده ګڼ شمېر ترهګر پکې وژل شویدي.
څېړونکي وايي، په افغانستان کې د القاعده د لوړې کچې پاکستاني قومندان وژنه یوځل بیا دا خبره راپورته کوي چې په افغانستان کې د ترهګرو ډلو زیاتره مشران د خطاب په څېر له پاکستان څخه دي.
د افغان او امریکايي چارواکو په باور په افغانستان کې دا وخت القاعده کمزوره کړای شوېده او یواځې د حقاني شبکې او طالبان فعاله دي.
د ناټو، افغانستان او امریکايي تل تور لګوي چې د یادو ترهګرو ډلو ځایونه په پاکستان کې دي خو پاکستان دغه تورونه نه مني.
