د پاکستان پلازمينې اسلام اباد سره جوخت پروت ښار راولپنډۍ کې پوليس د مشکوکو وسله والو د موجودګۍ په خبر په يو کور چهاپه وهلې چې په نتيجه کې يې وسله والو سره مقابله شوې ، او د دوه زنانوؤ په ګډون پکې پينځه مشکوک وسله وال او يو پوليس افسر وژل شوي دي .
راپورونه وايي د پېنډۍ په چکري روډ باندې دغه عمليات نن د زيارت په سحر ترسره شوي ، او په کور د چهاپې په مهال په مقابله کې د وژنو ترڅنګ څلور پوليس ژوبل شوي او پينځه مشکوک کسان هم نيول شوي دي .
راپورونه د چارواکو د خلې وايي چې پوليس ټيم په کور چهاپه وهله نو د کور پرې ګرنېډ وويشتل شو او بيا مقابله شوې ده ، چې پکې د وسله والو په ګډون پوليس افسر وژل شوی دی .
سرکاري ميډيا په چهاپه مار عملياتو کې د درې مشکوک ترهګرو د وژنې او درېو د نيولو راپور خپور کړی او وايي چې مقابله کې يو پوليس وژل شوی او درې نور ژوبل شوي دي .
پوليس وايي دغه عمليات يې د پنجاب صوبې د وژل شوي پخواني داخله وزير شجاع خانزاده په کېس کې د نيولي يو کس د معلوماتو په اساس کړي دي .
شجاع خانزاده باندې د اګست په مياشت کې په داسې مهال خودکش حمله شوې او هغه پکې د ۱۶ کسانو سره وژل شوی ؤ چې کله هغه د اټک په شادي خان سيمه کې په خپله دېره کې خلکو سره ناست ؤ .
چارواکو وئيلي پينډۍ کې په چکري روډ باندې د مقابلې نه پس يې علاقه په ګېره کې اخيستې او د لټون عمليات دوام لري .
