د پاکستان د کورنو چارو مرکزي وزير چودهري نثارعلي خان وايي ، چې ترهگر وس په ملک کې په اسانو هدفونو حملې کوي ، او په ترهگرو زمکه تنگه کړی شوې ده .
چوهدري نثار دغه خبرې نن د گل په ورځ پلازمينه اسلام اباد کې د قامي اسمبلۍ د داخله چارو قائمه کمېټۍ ته په وينا کې کړي دي .
د قائمه کمېټۍ د مشررانا شميم په مشرۍ غونډې ته په وينا کې د کورنو چارو مرکزي وزير ووئيل ، ترهگر اسان هدفونه په نخښه کوي سکول ، چرچ او جوماتونه اسان هدفونه دي ، په اسانو هدفونو د ترهگرو حملې د هغويې د کمزورۍ دليل دي .
د کورنو چارو مرکزي وزير د لاهور په يوحنا اباد علاقه کې د ځانمرگو بريدونو غندنه وکړه او ويې وئيل چې دا د ترهگرۍ بد مثال او غېرانساني عمل دی .
تېره ورځ لاهور کې د عيسائي لږکيو په چرچونو ځانمرگي بريدونو د ۱۵ کسانو وژل کېدو په گډون د ۷۰ پورې کسان ژوبل شوي وو ، د دغې بريد پړه د تحريک طالبان جماعت الاحرار ډلې په سر اخيستې وه .
چوهدري نثار ووئيل د ترهگرو ايجنډا سرکاري املاکو ته زيان اړول او مقصد يې قوم تقسيمول دي او قانون په لاس کې اخيستونکي هم د ترهگرو ايجنډا مخ په وړاندې بيايي . هغه ووئيل په ترهگرو مو تر ډېره حده زمکه تنگه کړې ده .
نوموړي ووئيل د ترهگرۍ په ضد د جوړې حکومتي پاليسۍ په نتيجه کې په مجموعي توگه په ملک کې امنيتي وضع ښه شوې ده .
بل لورته د اتوار په ورځ چرچونو باندې د ترهگر بريدونو په ضد د تېرې ورځې راهسې د ملک په مختلفو برخو کې د عيسايي لږکيو لخوا احتجاجي مظاهرې شوي ، د عيسايانو مشنرۍ سکولونه نن بند او په چرچونو کې د دعا ځانگړې دستورې راجوړې شوې وې .
د سندهـ او پنجاب حکومتونو نن په سرکاري توگه د ماتم د ورځې اعلان هم کړی ؤ .
داخله وزير غونډې ته په وينا کې د موبائيل سيمونو د تصديق په اړه ووئيل چې د يو کروړسيمونو تصديق شوی ، او د افغان سيمونو د بندېز سره امنيتي ځواکونو ته د ترهگرۍ په مخنيوې کې گټې ترلاسه شوي دي .
نوموړي زياته کړې چې چې د وسلې د لائسنسونو او شخصي سيکيورټي کمپنو په اړه هم گامونه پورته کولی شي . په دغې مهال د قائمه کمېټۍ ځينو غړو خپل تحفظات او سوالونه هم داخله وزير ته وړاندې کړي دي .
