دافغانستان سره په پوله پرته د پاکستان قبائيلي سيمه خيبرايجنسۍ کې دتندلارو اؤ ترهگرو په ضد روانو پوځي عملياتو کې امنتي ځواکونو د نورو 19ؤ ترهگرو د وژنې دعوه کړې ده خو ازادو سرچينو ددغه دعوې پخلى نۀ دى کړى.
دامنيتي ځواکونو سرچينو ډيوه راډيو ته د شورو په ورځ وئيلي دغه ترهگر په اکاخيل اؤ سينډپل سيمو کې تيره شپه د هوايي بمبارۍ په مهال وژل شوي چې پکې د ترهگرو يو مهم کمانډر هم شامل دى .
خو سرچينو ددغه کمانډر نوم اؤ کومې تندروه ډلې سره تړاؤ نه دى په ډاگه کړى.
سرچينې وايي په د خيبر ون په نوم روانو دغو عملياتو کې د تندلارو پينځۀ ځالې هم لۀ مينځه وړل شوي دي.
په خيبرايجنسۍ کې روانو دغو عملياتو کې تراوسه امنيتي ځواکونو د گڼ شمير تندلارو د وژلو دعوه کړې ده خو ددغو دعوؤ د ازادو سرچينو څخه تصديق ځکه نۀ کيږي چې دا مهال سيمې ته د خبريالانو ورتگ ناشونى شوى اؤ د عملياتو په بابله خوريدونکي ټول خبرونه يواځې د پاکستاني پوځ د مطبوعاتي څانگې ايي ايس پي ار له لوري مخې ته راځي.
په خيبرايجنسۍ کې د روانو دغو پوځي عملياتو له امله د دوؤ لکو نه زيات مقامي قبائيل هم بې کوره شوي اؤ دسرپناه دپاره يې بيلابيلو خوندي سيمو ته کډې کړي دي.
خيبرايجنسي دپاکستان هاغه قبائيلي سيمه ده چې پولې يې د افغانستان سره لگيدلي اؤ دغلته د وسله والو طالبانو ترڅنگ يو شمير سيمه ائيز تندروه وسله وال تنظيمونه هم په فعاليت بوخت دي
