د پنجا ب پوليسو په قصور ښار کې د شپږ کلنې زېنب په جنسي تېري او وژنه کې ککړ مشکوک تن تازه ويډيو خپره کړې ده .
په دغه ويډيو کې د پوخ عمر يو شېخ سړی ښکاري چې قميص پرتوګ يي اغوستي، توره ټوپۍ يي په سر ده او ورسره يي د بادامي رنګ کوټ هم اچولی، او د زېنب د کور مخې ته چکرې لګوي.
پوليس وايي ددې سړي رنګ ډنګ او جامه پېزار هم د هغه تن سره سمون خوري چې په لومړۍ ويډيو کې ورسره شپږ کلنه زېنب په آخري ځل ليدلی شوې وه.
په دغه تازه ويډيو کې د مشکوک ملزم ګونه ډېره واضحه ښکاري او د زېنب د کورنۍ او د مدني ټولنو غړي وايي پکار ده چې ددغې ويډيو د لارې عام اولس هم د پوليس سره د دغه مجرم په پېژنګلو او لټون کې کمک وکړي .
په قصور ښار کې شپږ کلنه زېنب ماشومه په روډ کوټ سيمه کې د جنورۍ په څلورمه نېټه له خپله کوره د سپارې سبق لپاره د ترور کره تله چې دهغې وروسته بې درکه شوه او په څلورمه ورځ يي د خزلې د يو ډېران نه مړی اومندلې شو.
ډاکټرانو د هغې د مړي پوسټمارټم رپوټ کې ويلي د وژلو نه وړاندې ورسره جنسي تېری هم شوی.
پوليس د هغې د مړي نه د DNA نمونې اخستي او وايي ډېر زر به په دغه بوګنونکي جرم کې ککړ ملزم ونيسي.
د زېنب ماشومې سره شوي زياتي وروسته د پاکستان په اکثره ښارونو کې احتجاجي مظاهرې شوي، په قصور ښار کې شوي مظاهرو کې دوه تنه مړه او ګڼ شمېر نور ژوبل شوي وو.
