د امريکې د محکمه خارجه لخوا جاري شوي يو بيان کې وئيل شوي ، چې د پاکستان او افغانستان دپاره د امريکې ځانگړی استازی ډېن فيلډمېن به خپله څلور ورځنۍ دوره کې د پاکستان او چين د چارواکو سره ويني ، او د چين د چارواکو سره به د افغانستان سره اړونده په مختلفو امورو خبرې اترې کوي .
په واشنگټن کې د محکمه خارجه لخوا جاري شوي بيان کې وئيل شوي ، ډېن فيلډمېن به د نهې په ورځ اسلام اباد ته ورسي ، او هلته به د حکومتي او پوځي چارواکو سره د ليدو نه علاوه د مدني ټولنې سره هم ملاقاتونه کوي .
اسلام اباد کې د دوه ورځو تېرولو وروستو به د امريکې ځانگړی استازی د زيارت په ورځ چين ته سفر کوي ، او هلته به د " هارټ آف ايشيا " د سرخط لاندې جوړه غونډه کې گډون کوي .
د دغې غونډې مقصد د علاقايي هېوادونو او نړيوالو قوتونو لخوا د افغانستان دپاره د سياسي ، امنيتي او اقتصادي مرستو سېوا کولو د امکاناتو او موقعو جائزه اخيستل دي .
د بيان ترمخه غونډه کې د گډون دپاره به د امريکې د اعلي کچې يو پلاوی هم بيجنگ ته ځي .
د امريکې د محکمه خارجه په بيان کې وئيل شوي ، ډېن فيلډمېن به د بيجنگ په سفر کې د چين د حکومتي چارواکو سره ليدل کوي ، او د افغانستان په حالاتو به ورسره خبرې اترې کوي .
