لاس رسیدونکی لینک

د برتانوي پوځ افغان ژباړونکی له برتانیا څخه ویستل کیږي


په دې تصویر کې د امریکايي پوځ یو عسکر په پکتیکا ولایت کې د افغان ژباړونکي ترڅنگ ځايي خلکو سره خبرې کوي

حفیظ الله حسین خیل په افغانستان کې له برتانوي پوځ سره دوه کاله د یوه تکړه، هوښیار او وفاداره ژباړونکي په توګه دنده ترسره کړېده.

طالبانو د هغه پلار په پښه باندې وروسته له هاغې وویشته کله چې دی وتښېده.

حسین خیل د تېرو دوو کلونو راهیسې برتانیې ته په رسېدو له خیریه ادارو سره کار کاوه.

د برتانیې د انډیپنډنټ ورځپاڼې د راپور له مخې، د برتانیې د کورنیو چارو وزارت ورته اوس ویلي دي چې په راتلونکو ورځو کې باید له دغه هېواد څخه ووځي.

حسین خیل د ۲۰۰۸ او ۲۰۱۲ کلونو ترمنځ په افغانستان کې د برتانوي پوځیانو او افغان افسرانو ترمنځ ترجماني کوله او اوس ورته ویل کیږي چې په برتانیه کې به ژوند نشي کولای.

د نوموړي سیاسي پناه غوښتنه په جون میاشت کې رد شوې شوې وه او بیا په محکمه کې هم دده د پاتې کېدو په پلوي پرېکړه و نشوه.

د تېرې چهارشنبې په ورځ ۲۶ کلن حسین خیل محکمې ته غوښتل شوی و او له هېواد څخه د وتلو پاڼه یې ورته ورکړېده.

دی اوس د اکسفورډ ترڅنګ په کمپس وېل کې بندي دی او ورته ویل شویدي چې د ډیسمبر له ۶ څخه تر ۲۲ نېټې پورې به له برتانیې څخه وویستل شي.

حسین خیل په ۲۰۱۴ کال کې وروسته له هاغې له افغانستان څه وتښېده کله چې ورته د طالبانو لخوا د مرګ ګواښونه وشول.

داسې ښکاري چې هغه به اطریش ته چېرې چې ده د لومړی ځل لپاره د پناه غوښتنې کاغذونه جمع کړي وه ډیپورټ یا وشړل شي.

هغه کسان چې هڅه کوي دده د شړلو مخنیوی وکړي وايي، چې کیدای شي حسین خیل بیرته افغانستان ته ولیږل شي چېرې چې د هغه ژوند به له خطر سره مخ وي.

په برتانیه کې د حسین خیل د پاتې کېدو لپاره کمپاین کونکي دده د پاتې کېدو لپاره له حکومت څخه غوښتنه کوي.

د برتانیې د دفاع وزارت په ۲۰۱۳ کې ویلي و چې هغه ۶۰۰ افغانان به په برتانیه کې د اوسېدو حق ولري چاچې په هلمند کې له برتانوي پوځ سره د ژباړونکي او یا په نورو ملاتړ کونکو دندو باندې کار کړی وي.

XS
SM
MD
LG