د امریکا صدر ډانالډ ټرمپ نن د پنجشنبې یا زیارت په ورځ وویلي داعش به ډیر زر مات شي.
ښاغلي ټرمپ دغه خبرې نن له پنټګان څخه د خپلې لیدنې پرمهال وکړې.
د امریکا د دفاع وزیر جنرال مټیس پنټګان ته د ټرمپ د رسېدو هرکلی وکړ او ټرمپ افغانستان ته د نورو سرتیرو د لېږلو په اړه د یوه خبریال پوښتنې ته په ځواب کې وویل:
٫٫مونږ به پدې اړه فکر وکړو او مونږ د داعش پرضد ډیر ښه روان یو. داعش به ډیر ژر له منځه ولاړ شي ډیر ژر.٬٬
د امریکا صدر ډنالډ ټرمپ په پنټګان کې د دفاع له وزیر جنرال ماټیس او یو شمېر نورو چارواکو سره خبرې کړیدي.
دغه لیدنه کتنه د تړلو دروازو ترشاه وه خو اټکل کېده چې پدغو خبرو کې به په افغانستان کې د سرتیرو د شمېر او د داعش پرضد په روانو هلو ځلو باندې بحث وشي.
ټاکل شوې وه چې ټرمپ به له پنټګان څخه د خپلې لیدنې پرمهال د امریکا د پوځي مرکزونو له کسانو سره هم وګوري.
