وزیراعظم نوازشریف ویلي په شریکه به هیواد نه د ترهگرۍ نوغي وباسي او په شمالي وزیرستان کې د وسله والو خلاف روان اپریشن د "ترهگرو" ملا ماته کړې ده.
وزیراعظم نوازشریف دا خبرې اسلام آباد کې د تنظیم اتحادالمدارس د نمائندگانو سره په یوه غونډه کې کړې دي. غونډه کې ترهگرۍ خلاف د نوازشریف حکومت په تگ لاره، نیشنل ایکشن پلان، باندې صلاح مشوره کیده. تنظیم اتحادالمدارس کې د مختلفو مسلکونو مدرسې شاملې دي.
غونډه کې د پوځ مشر جنرل راحیل شریف هم ناست وو.
د سرکاري اعلاميي ترمخه، نوازشریف د علماؤ غونډې ته وویل نیشنل ایکشن پلان ترهگرۍ خلاف د جنگ تر ټولو اهمه ایجنډه ده او ددې په ٢٠ ؤ واړو ټکو په رورو عمل کولی شي.
نوازشریف وویل ترهگرۍ خلاف د قامي تگ لارې په عملي کولو کې به د مدرسو مشرانو سره صلاح مشوره کولی شي. هغه وویل مدرسو ته هم پکار ده چې حکومت سره کومک وکړي.
وزیراعظم وویل حکومت په ټولنه کې د مدرسو د اهم کردار نه خبر دی او په دې لړ کې د مدرسو کردار نور هم بهتر کول غواړي. نوازشریف وویل حکومت به د مدرسو په نصاب کې د جدت راوستلو دپاره د مدرسو لاس امداد کوي. هغه وویل مدرسو ته په خپل تعلیمي نظام کې اصلاحات کول پکار دي.
نوازشریف وویل مدرسې په هیواد کې د فرقه وارانه تشدد او د ترهگرۍ په مخه نیولو کې کردار ادا کولی شي او ددې رجحاتو خلاف مفکوره په وړاندې بوتللی شي.
سرکاري بیانیه وايي د تظیم اتحادالمدارس علماؤ په غیر مشروط توگه ترهگرۍ خلاف د قامي تگ لارې حمایت اعلان وکړو.
پاکستاني امنیتي ځواکونو تیر کال د جون د میاشت راهسې شمالي وزیرستان کې د وسله والو خلاف د ضرب عضب په نوم اپریشن شورو کړی دی. د حکومت او پوځي مامورین په اپریشن کې د سلگونو په شمیره کې د پاکستاني او غیر ملکي وسله والو د وژنې خبره کوي. خو خپله طالبان د پوځ دعوې ردوي.
مبصرین هم شمالي وزیرستان کې د اپریشن د کامیابۍ په اړه د حکومت په خبرو سوالونه راپورته کوي.