د افغانستان سره د پاکستان سرحد د امنیتي اسبابو په بنیاد تړل شوی دی. دا خبره د پاکستان فوج کړې ده.
د فوج د مطبوعاتي څانگې د زیارت، پنجشنبې، په ورځ په ټویټر یو مختصر بیان کې وویل پوله به د بل امر پورې تړلې وي.
پاکستان دا گام په سند صوبه کې د لال شهباز قلندر په مزار د داعش د ځانمرگي حملې ورسته اخیستی دی. ایسوسي ایټډ پریس خبري اداره وايي په حمله کې ٧٥ کسان وژل شوې دي.
د فوج بیان دا نه ده په ډاگه کړې چې د افغانستان او پاکستان ترمنځ د تگ راتگ یوازې یوه لار او که ټول سرحد تړل شوی دی خو د پاکستان ډان ورځپاڼه وايي د طورخم پوله بنده کړی شوي ده.
ډان د پاکستاني مامورینو له قوله ویلي چې د طورخم سرحد په سمدستي ډول د هر قسم تگ راتگ دپاره تړل شوی دی چې پکې د تجارتي توکو وړل راوړل هم شامل دي.
افغانستان لخوا د پاکستان د سرحد بندولو په اعلان په سمدستي توگه څه ردعمل مخې ته نه دی راغلی.
په طورخم د پاکستان د دروازې په شخړه تیر کال هم پاکستان د څو ورځو دپاره دغه پوله تړلې وه. په دغه مسله باندې د افغان او پاکستاني ځواکونو ترمنځ د ډزو تبادله هم شوي وه چې پکې د مطبوعاتي رپورټونو ترمخه دواړو خواؤ ته څلور عسکرو ژول شوي دي.