د پاکستان پارلیمان کې د مخالفه سیاسي ګوند پیپلز پارټۍ غړي او وتلي سنیټر فرهت الله بابر ویلي دا خبره اوس څرګنده ده چې د سعودي عرب پوځي ایتلاف د ایران پرضد دی.
په سنیټ کې د یو بحث په وخت سنیټر فرهت الله بابر وویلي چې د سعودی عرب دغه پوځي ایتلاف د اهدافو د معلومیدو وروسته اوس پوښتنه دا ده ایا پاکستان به پخوانی جنرال راحیل شریف ددغه پوځي ایتلاف له مشرۍ نه واپس را غواړي او کنه؟
د پاکستان حکومت وړاندې پارلمان ته دا باور ورکړی وه چې څه وخت هم وغواړي نو جنرال راحیل شریف ددغه ایتلاف د مشرۍ نه بیرته رابللی شي.
د پاکستان د خارجه چارو لپاره صلاکار سرتاج عزیز سنیټ ته ویلي چې د سعودي عرب د پاچا څو ورځې وړاندې دغه اعلان چې پوځي ایتلاف ایران هم په هدف کولای شي هسې یو سیاسي بیان وو.
څیړنکاران وایي د پاکستان د خارجه چارو صلاحکار سرتاج عزیز د سعودي د پاچا د بیان دفاع بې ځایه ده او پکار ده چې سعودي چارواکي په دې اړه خپل دریځ ښکاره کړي.
تیره ورځ د سنیټ چیرمین رضا رباني د پاکستان حکومت لخوا د سعودي عرب سره پوځي ایتلاف په اړه پارلمان ته د معلوماتو د نه ورکولو په رویه سخت خفګان ښودلی وه.
رضا رباني ویلي وو: ٫٫داسې ښکاري د پارلمان څه حیثیت نشته٬٬.
د سینټ غړي وايي د تیرو څو ورځو راهیسې حکومتي غړي پارلمان ته د سعودي عرب سره پوځي ایتلاف کې د شاملېدو په اړه د معلوماتو ورکولو نه ډډه کوي.
د سنیټ یوه غړي طاهر حسین مشهدي ډیوه راډیو ته په یوه مرکه کې ویلي: ٫٫د پاکستان خلک د هېواد د سټراتېژیکي ښېګڼې او خارجه تګلارې د حکومتي فیصلو په اړه ډیرې اندېښنې لري٬٬.
د پاکستان حکومتي چارواکو وخت په وخت دا تکرار کړېده چې د دوو مسلمان هېوادونو ترمنځ په کړکېچ کې به بې طرفه پاتې کیږي.
ایران هم په پاکستان څو اونۍ وړاندې دا غږ کړی وه چې د سعودي عرب د ملګرتیا نه دې ډډه وکړي ځکه چې د سعودي په مشرۍ کې جوړ شوی پوځي ایتلاف د سني هېوادونو ایتلاف دی.
د سعودي عرب په مشرۍ کې جوړ د څلویښتو هیوادونو ایتلاف باندې تر ټولو غټه نیوکه دا ده چې دا د سني هیوادونو ایتلاف دی او حدف يې شیعه ایران دی.
