د جوزجان ولایت محلي مقامات وایي په درزآب او خانقاه ولسوالیو کې د داعش د امنیتي گواښونو په وجه شاوخوا ٢٧ ښوونځي تړل شوي دي.
د جوزجان ولایت د ښونې مسوولین وایي چې همدا اوس د درز آب په ولسوالۍ کې څه دپاسه ١٨ زره زده کوونکي د داعش له ویرې ښوونځیو ته نه ځي.
د افغانستان په شمالي ولایتونو کې د داعش د ډلې گواښ ددې سبب شوی دی چې د نجونو او هلکانو د زده کړو بهیر له ډول ډول ازمون سره مخامخ شي.
د جوزجان ولایت د معارف رئیس عبدالحی یشین، د امریکا غږ ته وویل چې "کورنۍ ددې ډلې [داعش] د گواښونو له ویرې خپل اولادونه حتی هغو ښوونځیو ته هم نه استوي چې د حکومت تر ادارې لاندې دي."
د درزآب ولسوالۍ یو اوسیدونکي عبدالمراد د امریکا غږ ته وویل جې د داعش د گواښونو په وجه خپل اولادونه ښوونځي ته نه استوي.
هغه وویل "زمونږ ښوونځي تړلي دي، د درزآب په ولسوالۍ کې قومانداني د دولت په لاس کې ده او ولسوالي د داعش په لاس کې. درس او تعلیم نشته، داعشیان [خلک] وژني او نه یې پریږي".
د درزآب ولسوال باز محمد داور امریکا غږ ته ویلي چې له ښوونځي نه د ١٨ زره زده کوونکو پاته کیدل یوه فاجعه ده.
ښاغلي داور وویل "۲۵ ښوونځي د داعش رپه ولکه کې دي، زمونږ ښوونکي نه شي کولای هلته لاړ شي او تدریس ورکړي. زده کوونکي هم نشي تلای، هغه ښوونځي چې د دولت په تصرف کې دي هلته هم زده کوونکي د داعش له ویرې نشي تلای".
هغه زیاته کړه چې داعشیانو ځایي خلکو ته ویلي چې اولادونه دې مکتب نه استوي.
د جوزجان ولایت د درزآب او قوش تپه ولسوالۍ شاوخوا دوه سوه ښوونځي لري. خو د سرپل ولایت سره د گډې پولې په خاطر دغه دوه ولسوالۍ د داعش د فعالیت په مرکز اوښتې دي.
همداشان د جوزجان د خانقاه په ولسوالۍ کې هم دوه ښوونځي د طالبانو او داعش د گواښونو له وجې تړلي دي.
د جوزجان ولایت د والي ویاند رضا غفوري د امریکا غږ ته وویل چې هڅه کوي د سیمې د اوسیدونکو په منځگړتوب دغه ښوونځي بیرته فعال کړي خو تر اوسه د داعش سخت دریځه دې کار ته نه دي حاضر شوي.
یادگیرنه: د خبریال میرویس بیژن دا خبر د وي او اشنا ریډیو نه اخیستل شوی دی
