د ننګرهار په اچین ولسوالۍ کې یوه حکومتي تن ویلي طالبان به په تورې بوړې کې د داعش جنګیالیو پر ضد د روانو عملیاتو په لړ کې پر حکومتي پوځیانو برید نه کوي.
سرچینې د نوم د نه ښودلو په شرط امریکا غږ ته ویلي حکومت د ولسونو په منځګړتوب له طالبانو سره موافقه یا معاهده کړې چې طالب وسله دې پر افغان قواوو ډزې نه کوي.
تیره اونۍ د ننګرهار سیمه ییزو چارواکو خبر ورکړی وو داعش وسله والو د دغه ولایت د پچیراګام ولسوالۍ د تورې بوړې ستراتېژيکه سیمه ترخپلې ولکې لاندې راوستې ده.
سرچینې د حکومت او طالبانو د تازه موافقې د جزئیاتو په اړه نور څه نه دي ویلي.
په اچین ولسوالۍ کې د طالبانو یوه قوماندان ویلي چې دوي له حکومت سره د کړې موافقې له امله خوښ نه دي.
طالبانو ویره ښودلې چې حکومتي ځواکونه ممکن ده د تورې بوړې تر تصیفې وروسته په سیمه کې ځايي طالبان وځپي.
د ننګرهار د ولایتي شورا منشي، ذبیح الله زمري له امریکا غږ سره په خبرو کې له حکومت سره د طالبانو مرسته ونه منله او طالبان یې د نظام دښمنان وبلل.
زمري ادعا وکړه چې توره بوړه د طالبانو په ولکه کې وه او په وینا یې دغې ډلې یاده سیمه داعش جنګیالیو ته سپارلې ده.
د دفاع وزارت احصائیې ښیې چې په ننګرهار ولایت کې د داعش ډلې د فعالیتونو له پیل راهیسې، د افغان ځواکونو د عملیاتو په نتیجه کې د دغې ډلې د مهمو مشرانو او قوماندانانو په ګډون ۲۵۰۰ تنه داعش جنګیالي وژل شوي او ۸۰۰ نور یې ټپیان شوي دي.
د افغانستان د ملي دفاع سرپرست وزیر، طارق شاه بهرامي وایې چې افغان پوځیان تورې بوړې ته رسیدلي دي. د دفاع وزارت د مقاماتو په وینا افغان پوځیانو طالب او داعش جنګیالي دواړه په شاه تمبولي دي.
د اشنا ریډیو نه په مننه
