د روس صدر ولاديمير پيوټن ويلي افغانستان کې امنیتي خطرې سېوا کيږي او روس تيار دی چې د افغانستان د حکومت سره مرسته وکړي.
پيوټن په داسې حال کې د افغانستان په امنيت اندېښنه ښودلې چې په دغه هېواد امريکايي ځواکونو د داعش او طالبانو پرضد هوايي بريدونه پراخه کړي دي.
د روس صدر ويلي روس او امریکا په افغانستان همکاري هم کولی شي.
خو بل لور ته امریکايي او افغان چارواکي د وړاندې نه په روس تور لګوي چې د طالبانو ملاتړ کوي خو ماسکو دغه تورونه ردوي.
په افغانستان کې لوړ پوړي امريکايي چارواکي وايي هلته يې په نوې ستراټيجۍ پرمختګ کړی دی.
په افغانستان کې د نېټو او امریکایي ځواکونو د ماموریت عملیاتي مسؤل جنرال لنس بنچ ویلي دي چې د اسیا د جنوب او افغانستان لپاره د امریکا نوې سټراټيجۍ د افغان امنیتي او دفاعي ځواکونو په ګټه حالات بدل کړي دي.
د روس صدر ويلي ماسکو د واشنګټن سره اړيکې معمول ته راوستل غواړي.
د امریکې د کال ۲۰۱۶م په انتخاباتو کې داسې تورونه دي چې روس پکې لاسوهنه کړې وه او په دغه خبره د دواړو هېوادونو ترمنځ کړکېچ رامنځته دی.
پيوټن د امریکا په انتخاباتو کې لاسوهنه رد کړې ده او زياته کړې يې ده چې د ډونلډ ټرمپ سياسي مخالفين په هغه قانوني پوښتنې راولاړې کړي.