لاس رسیدونکی لینک

اشرف غني د ټېلرسن سره د ليدو وروستو هند ته تللی


د افغان صدر اشرف او هند وزيراعظم نريندرا مودي د تېر کال ستمبر د مياشتې په نوي ديلي کې د ليدنې عکس.

د افغانستان صدر اشرف غني نن د سه شنبې په سهار په يو ورځني سفر د هند پلازمينې نوي ديلي تللی دی، نوموړي تېره ورځ د امريکې د بهرنو چارو وزير رېکس ټېلرسن سره ليدلي وو.

د ارګ ترمخه اشرف غني به د لوړ پوړي پلاوي په مشرۍ د هند وزیراعظم نريندرا مودي سره وويني، "او د افغانستان او هند ترمنځ په بېلابېلو برخو کې د اړیکو په پراختیا او همکارۍ به بحث او خبرې وکړي".

اشرف غني په داسې حال کې د هند سفر کوي چې نن د سه شنبې په ورځ به رېکس ټېلرسن هم د اسلام اباد د راتګ وروستو هند ته لاړ شي.

د امریکا صدر ډونلډ ټرمپ د اګست په میاشت کې د افغانستان او سويلي اسيا په اړه خپله نوې تګلارې اعلانولو کې د هند نه غوښتي چې د افغانستان سره دې په اقتصادي برخه کې سېوا مرسته وکړي او په دغه هېواد کې دې ځواکمن رول ولوبوي.

افغانستان وايي پلان لري چې په راتلونکو پنځه ؤ کالو موده کې د هندوستان سره د دوه اړخیزې سوداګرۍ او پانګونې کچه لسو اربو ډالرو ته ورسوي.

افغانستان کې د هند په شتون د پاکستان اندېښنې

پاکستان په افغانستان کې د هند په زياتېدونکي اثر اندېښنې څرګندوي.

د پاکستان وزيراعظم شاهدخاقان عباسي د ستمبر په مياشت کې د امريکې په نيويارک ښار کې دبهرنو اړيکو د شورا په ناسته کې په افغانستان کې د هند د رول په اړه ويلي ؤ، افغانستان کې ورته د هند کوم سياسي او پوځي رول د قبلولو نه دی، او سرمايه کاري د هر هېواد حق دی هر چرته يې کولی شي.

د پاکستان اندېښنو ته د افغانستان ځواب

افغان چارواکي وايي پاکستان دې په افغانستان کې د هند په موجودګۍ اندېښمن نشي.

هم د ستمبر په مياشت کې د افغانستان اجرايي رئيس عبدالله عبدالله د هند سفر کړی او د وزيراعظم نريندرا مودي سره په لیدنه کې يې په دې خبره زور راوړی چې په پاکستان کې د طالبانو او حقاني شبکې د خوندي ځالو د مينځه وړلو لپاره باید په پاکستان اړین فشار واچول شي.

د هند وزيراعظم مودي د امريکا د ترهګرۍ په ضد نوې تګلارې او په پاکستان کې د ترهګرو د پټو ځالو د ختمولو ملاتړ کړی ؤ.

هند هم په پاکستان تور لګوي چې په خپله خاوره په هند او هندي کشمير کې ترهګري کوونکې وسله والې ډلې ساتي.

پاکستان د هند او افغانستان دا ادعاوې ردوي او وايي، چې په هېواد کې يې وسله واله ډلې شتون نه لري.

XS
SM
MD
LG