راپورونه وايي د کندهار ولايت (صوبې) معروف ولسوالي (ضلعې) طالبانو نيولې خو چارواکي دغه خبره ردوي چې ولسوالي ټوله د طالبانو په ولقه کې ده.
د کندهار د پولیسو مشر جنرال عبدالرازق ويلي چې په معروف ولسوالۍ کې سخته جګړه روانه ده خو د ولسوالۍ د طالبانو د نيولو ادعا تشې خبرې ګني.
نوموړي په جګړه کې د څلور تنه پوليسو وژل تائيد کړي خو د ولسوالۍ د نيولو خبره ردوي.
هغه ويلي هوايي ځواکونو ولسوالۍ کې تېره شپه بریدونه کړي، چې له امله یې ګڼ طالب وسله وال وژل شوي او ژوبل شوي دي.
د افغانستان په جنوب کې پاکستان سره په پوله پرتې کندهار صوبې چارواکو ويلي، چې د معروف ولسوالۍ په مرکز د درېو ورځو نه د طالبانو بريدونه روان ځکه د ولسوالۍ مرکز بل ځای ته منتقل کړی شوی دی.
يو چارواکي د نوم نه ښکاره کولو په شرط امريکا غږ سره په خبرو کې منلې چې د ولسوالۍ مرکز وسله والو طالبانو نيولی ځکه مرکز اوس د سالیسون سیمې ته منتقل کړی شوی دی.
راپورونه وايي د وسلې نه لرلو له امله ۱۳ پوليس وسله والو طالبانو نيولي او څلور يې ترې وژلي هم دي.
معروف د کندهار له نا امنیه ولسوالیو څخه ګڼل کیږي.
طالبانو په یوه اعلامیه کې په بشپړه توګه د معروف د ولسوالۍ د نیولو ادعا کړې او ویلي دي، چې د دغې ډلې د وسله والو لخوا د ولسوالۍ د مرکز د نیولو وړاندې افغان ځواکونو د ولسوالۍ په مرکز کې دولتي تاسیساتو ته اور اچولی او ودانۍ یې په خپله ورانې کړي دي.