څيړونکي وايي که څه هم د پاکستان او افغانستان ترمنځ وړاندې کومې خبرې عملي شوي نه دي خو دې ځل له د پاکستان د پوځ سرلښکر جنرال قمرجاوېد باجوه د کابل د سفر وروستو ځينې مثبت بدلونونه مخې ته راتلی شي.
څيړونکي وايي د افغانستان او پاکستان ترمنځ اړيکو کې پرمختګ به د امريکا د صدر ډونلډ ټرمپ د پاکستان په اړوند د سخت بيان نتيجه وي.
جنرال باجوه د روانې اوونۍ په سر کې د کابل سفر کړی افغان صدر اشرف غني سره يې خبرې اترې شوې وې.
څيړونکی اسماعيل خان وايي، د افغانستان او پاکستان په اړيکو کې د پرمختګ په اړوندد امريکا د دفاع وزير جېم مېټس بيان ډېر مهم دی،
او" هغه (مېټس) ويلي دي چې د جنرال باوجوه د کابل د سفر په ناستو او ليدنو کې امريکايان هم ناست ؤ او هغوي ويلي دي چې په دې کې ډېر پرمختګ شوی دی يو نوی امېد پېدا شوی دی او نوی باب پرانستل کيږي د پاکستان او افغانستان د اړيکو په سلسله کې".
نوموړی اسماعيل خان وايي هغه "هم ګڼي چې څه خبره خو مخکې تلې ده، ځکه چې دلته د کورکمانډرانو په غونډه کې به هم په هغې څه خبرې شوي وي.
هغه زیاته کړه دا پرمختګ د امريکا د صدر ډونلډ ټرمپ د اګست د میاشتې د بيان نتيجه ده.
د چهارشنبې په ورځ افغان صدر اشرف غني په صدارتي ماڼۍ کې د سياسي ډلو اوپخوانو جهادي مشرانو سره ليدلي او د جنرال باجوه سره شوې خبرې يې د هغو سره شريکې کړي دي.
دوه ورځې وړاندې د جنرال باجوه په مشرۍ هم پوځي مرکز (جي اېچ کيو) راولپنډۍ کې د کورکمانډرانو غونډه شوې وه.
صدر ټرمپ د اګست په مياشت کې د افغانستان او سويلي اسيا په اړوند خپلې اعلان کړې تګلاره کې په پاکستان سختې نيوکې کړې او ويلي يې ؤ چې نور به پاکستان کې د ترهګرو په موجودګۍ غلی پاتې نشي.
خبريال او څيړونکی حسن خان هم وايي داسې ښکاري چې دې ځل له مثبت بدلون وليدل شي.
" زما په خيال پاکستان کې د افغانستان دپاره پوره بدلون راغلی دی" او يوه ويره د امريکې د صدر بيان دی هغې پکې تېزي راوستله.
حسن وايي هغه وايي څو نورې خبرې دي چې د دې پرمختګ سبب به وګرځي.
"یو دا چې پاکستان کې دننه هم د تېرو څو کلونو نه د ترهګرۍ په اړوند بيانيه بدلېدل، په وروستيو کې د امريکې د صدر ډونلډټرمپ د افغانستان په اړه تګلاره کې د پاکستان په اړوند سخته رويه او بيا د چين ـ پاکستان راهداري او د چين د پاکستان په کورنۍ او بهرنۍ پاليسۍ اثر".
د ارګ د بيان ترمخه د صدر اشرف غني د مشرانو سره د ناستې برخه والو هم کابل ته د پاکستان د پوځ د سرلښکر د سفر هرکلی کړی او له پاکستان سره د مذاکراتو پیل یې مهم بللی دی.
په عېن حال کې چې د پاکستان د بهرنو چارو وزير خواجه اصف د امريکا په سفر دی د امريکايي چارواکو د پاکستان په اړوند سخت بيانونه دوام لري.
