د پاکستان قبايلي سیمه باجوړ ايجسنۍ کې د سړک غاړې ښخ يو بم په چاؤدنه کې ځايي پوليټيکل تحصيلدار او د لیويز څلور سرتيري وژل شوي او يو ژوبل شوی دی.
د پوليټيکل انتظاميې ترمخه د سړک غاړې بمي چاؤدنې پېښه نن د اتوار/يکشنبې په سهار د باجوړايجنسۍ لویې ماموند په تنګي ګړيګال علاقه کې رامنځته شوې ده.
د چارواکو په وېنا تحصيلد فواد د خپلو ساتونکو ليويز سرتېرو سره په ګاډي کې روان ؤ چې د سړک غاړې ښخ بم پرې وچاؤدو.
پوليټيکل چارواکو پخلی کړی چاؤدنه کې تحصیلدار سره د څلورو سرتېرو وژل شوی او يو سرتېری ژوبل شوی دی.
د پېښې زمه واري چا نه ده منلې.
د پېښې وروستو امنيتي ځواکونه علاقې ته رسېدلي او د لټون عمليات يې پېل کړي دي.
د افغانستان سره په پوله پرته قبايلي سیمه کې له دې وړاندې هم وخت په وخت دغه ډول پېښې رامنځته شوي او د امنيتي ځواکونو، ځايي انتظاميې د چارواکو سره پکې د امن لښکر مشران او غړي هم وژل شوي دي.
د اګست په مياشت کې د باجوړ ایجنسۍ په چارمنګ علاقه کې يوه چاؤدنه کې لږ ترلږه څلور تنه وژل شوي او ۲۵ نور ژوبل شوي وو.
په عېن حال کې چې پاکستان کې د وسله والو ډلو تندلارو په ضد د پوځي عملياتو په ترڅ کې په ځانګړي ډول قبايلي سیمو کې د امنیت په ځای کېدو ادعاوې کيږي او اوس هم په ملک کې د ردالفساد په نوم عملیات دوام لري.
خو په قبايلي سیمو کې بيا هم د ترهګرۍ پېښې دوام لري.