لاس رسیدونکی لینک

جنرال نیکلسن:افغانستان کې به داعش ته ماتې ورکوؤ


هغه زیاته کړې دا په تیریو کال کې د داعش دریم امیر دی چې مونږ د خپلو افغان ملګرو سره د عملیاتو په پایله کې وژلی دی

په افغانستان کې د امریکایي اؤ نړیوالو ځواکونو کمانډر جنرال جان نیکولسن وایي چې په تیر یو کال کې د امریکا او افغان ځواکونو د ګډو عملیاتو په پایله کې د اسلامي دولت یا داعش د خراسان د ولایت ډله ډیره ځپل شوې.

هغه وایي په دغه موده کې یې د نورو ډیرو جګ پوړو قوماندانانو سربیره د داعش درې مشران هم وژلي اؤ که څلوم مشر وټاکل شي هغه به هم ووژنو.

جنرال نیکولسن وویل "د جولای په یوولسمه مونږ ابو سعید د داعش د خراسان ولایت امیر په کونړ کې په یو هوایي برید کې ووژلو"

هغه زیاته کړې دا په تیریو کال کې د داعش دریم امیر دی چې مونږ د خپلو افغان ملګرو سره د عملیاتو په پایله کې وژلی دی،

جنرال نیکولسن د شنبې په ورځ په افغانستان کې افغان ځواکونو سره د قاطع ملاتړ ماموریت امنیتي همکاریو په برخه کې د امنیت د انتقال د ګډې قوماندانۍ (سیستیکا) د قوماندان د بدلېدو د مراسمو په څنډو کې خبریالانو سره خبرې کولې.

جنرال نیکولسن وویل، چې د امریکا پوځ د افغانستان په هرځای کې د داعش پر وړاندې عملیات ترسره کوي،

خو هغه وویل چې دا عملیات یې په ځانګړي ډول د ننګرهار د اچین په ولسوالۍ، کونړ او حتی د جوزجان په ولایت کې د داعش د ډلې پر وړاندې ترسره کړي دي.

جنرال نیکولسن وویل چې د اسلامي دولت یا داعش پر وړاندې به دا عملیات د دغې ډلې د بشپړې ماتې تر وخته په افغانستان کې ادامه ومومي.

جنرال نیکولسن وویل " د داعش ډیر وسله وال افغانان نه دي، دا بهرنیان دي، چې افغانستان ته راځي او دلته افغانان له ناخوالو سره مخ کوي، مونږ به د افغان حکومت سره د دغې ډلې له منځه وړلو لپاره کارته دوام ورکړو ".

جنرال نیکولسن وویل چې که چیرې داعش خپل څلورم امیر هم وټاکي دوی به یې ووژني.

په افغانستان کې د قاطع ماموریت قوماندانۍ تیره شپه ناوخته د ابو سعید د وژل کیدو خبر خپور کړ.

د داعش ډلې لا تراوسه د خپل امیر ابو سعید د وژل کیدو خبر نه دی تائید کړی.

د سیستیکا قوماندان تورن جنرال ریچارد کایزر نن د قاطع ملاتړ ماموریت په قوماندانۍ کې د یو لړ ځانګړو پوځي مراسیمو په ترڅ کې دغه قومانداني تورن جنرالې رابن فانتس ته وسپارله.

(د امریکا غږ اشنا په مننه)

XS
SM
MD
LG