لاس رسیدونکی لینک

پیښور:عملیاتو کې دوه ترهګر وژل شوي،پینځه عسکر ژوبل


د ترهګرو سره د پولیسو دغه مقابلې تر دریوؤ ساعتو دوام وکړو چې پکې پوځ هم دپولیس مرستې ته ورسیدو.

دپيښور په کلیواله سیمه څمکنو کې د ترهګرو په ضد عملیاتو کې دوه جنګیالي وژل شوي اؤ پینځه عسکر ژوبل شوي دي.

دخیبرپښتونخوا د پولیسو مشر یا ايي جي پي صلاح الدین محسود وایي په وژل شوؤ کې د ترهګرو یو کمانډر هم شامل دی چې په پولیسو به یې منظم بریدونه کول.

د پولیسو چارواکي ویلي ترهګر د اوړو د یو پخواني مل په خالي ودانۍ کې موجود وؤ اؤ چې پولیسو ترې ګیره تاؤ کړه نو هغوئ په پولیسو ډزې پیل کړې.

د پولیسو په وینا د ترهګرو سره د پولیسو دغه مقابلې تر دریوؤ ساعتو دوام وکړو چې پکې پوځ هم دپولیس مرستې ته ورسیدو.

د پیښور د پولسیو مشر ښاغلي طاهرخان خبریالانو ته ویلي په دغه نښته کې دوه ترهګر اؤ پینځه امنیتي عسکر ژوبل شوي .

هغه ویلي په ژوبلو کې دوه پوځیان اؤ دوه ایس ایچ اوز هم شامل دي خو حالت یې د خطرې څخه بهر دی.

پولیس دعوه کړې ده چې ددغو ترهګرو یو مرستیال یې نیولی اؤ د ودانۍ څخه یې چاودیدونکي مواد، وسله ویډیوز اؤ ځینې مهم کاغذونه ترلاسه کړي‌ دي.

دخیبرپښتونخوا د پولیسو مشر ښاغلي صلاح الدین محسود میډیا ته ویلي چې دا د پولیسو یوه لویه لاسته راوړنه ده.

د پولیسو مشر ویلي دغو ترهګرو په اوسنو ورځو کې په پولیسو اؤ عامو خلکو شوؤ بریدونو کې لاس لرلو.

له دې وړاندې د روانې میاشتې په ۱۵مه نیټه هم د څمکنو په پولیسو د ترهګرو یو برید کې درې پولیس عسکر وژل شوي وؤ.

اخوا هم دخالي په ورځ دپيښور سره پیوست دچارسدې ضلعې مندني سیمه کې دپولیسو اؤ مفرورانو ترمینځ نښته کې د خان ولي په نوم یو اسسټنټ سب انسپکټراؤ یو مفرور وژل شوي دي.

په خیبرپښتونخوا اؤ په ځانګړي ډول پیښور کې وخت په وخت په پولیسو اؤ امنیتي ځواکونو د بریدونو خبرونه مخې ته راځي.

دا په داسې حال کې ده چې دپاکستان پوځ دعوې کوي چې قبائیلي سیمو کې دضرب عضب عملیاتو سره یې د ترهګرو ملا ماته کړې اؤ هغوئ اوس د منظمو بریدونو توان دلاسه ورکړی دی.

خو ددغو دعوؤ باوجود ګڼ شمیر پولیس افسرانو اؤ ځلمو خپل ژوند ترهګریزو بریدونو کې بائیللی دی.

په ۲۱مه مئ هم دپښتونخوا د کوهاټ په لاچۍ سیمه کې د ترهګرو په ډزو د دوؤ پولیس افسرانو په ګډون څلور عسکر وژل شوي دي.

  • 16x9 Image

    فاروق فراق

    فاروق فراق د وي او ای ډیوه خبریال دی، د خبریالۍ څانګه کې د ۲۵ؤ کالو اوږده تجربه لري. د پښتو، ادب، کلتور اؤ تاریخ برخه کې ډیوه راډیو، ټي وي اؤ ویب پاڼې دپاره ځانګړې خپرونې راجوړوي

XS
SM
MD
LG