د پاکستان په څلورو واړو صوبو، قبایلي سیمو او ګلګت بلتستان کې د پولیو ضد څاڅکو درې ورځنې کمپاین پېل شوی دی. د کال ۲۰۱۷م دا وړومبنی کمپاین به نن د ګل د ورځې نه تر د زیارت د ورځې پورې روان وي.
د خېبرپښتونخوا صوبې په ۲۵ ضلعو کې به د پينځه ؤ کالو نه کم عمر ۵۶ لاکه او ۵۶ زرو ماشومانو ته د ۱۵ زرو نه زیات ټیمونه د پولیو ضد څاڅکي ورکوي.
د چارواکو په وینا قبایلي سیمو کې به لس لاکه او ۲۹ زره ماشومانو ته د پولیو څاڅکي ورکول کيږي او د دغه کار دپاره د څلورو زرو نه زیات ټیمونه په ځای کړی شوي دي.
د بلوچستان په ۱۵ ضلعو کې به د پولیو څاڅکي ورکولی شي او په پاتې نورو ضلعو کې به د واورې د لاسه د لارو بندېدو له امله راتلونکې اوونۍ کمپاین چلولی شي.
په کراچۍ کې د پولیوضد کمپاین د چارواکو مرستیال ډاکټر نصرت وایس اف امریکا ډیو ریډیو سره خبرو کې وویل، په درې ورځني کمپاین کې به کراچۍ کې د پينځه ؤ کالو نه کم عمر ۲۲ لاکه او په ټوله سندهـ صوبه کې نزدې ۸.۴ ملینه ماشومانو ته د پولیو ضد څاڅکي ورکولی شي.
چارواکي وايي د درېو ورځو وروستو به په ځینو ځایونو کې یوه او په ځینو کې نورې درې ورځې ټیمونه ګرځي او پاتې ماشومانو ته به څاڅکي ورکوي.
د سرکاري میډیا ترمخه د پنجاب صوبې په یواځې شپږو ضلعو کې د پولیو ضد څاڅکي ورکول کيږي.
د چارواکو په وینا ټولو ماشومانو ته د پولیو څاڅکو ورکولو یقيني کولو په موخه د بسونو په اډو، رېل ګاډي په سټېشنو او عامو ځایونو باندې هم د پولیو ضد څاڅکو مرکزونه جوړ کړی شوي، او په ټول ملک کې د پولیو ټیمونو د ساتنې دپاره کلک ګامونه پورته کړی شوي دي.
پاکستان کې تېر کال یواځې په ۱۴ ضلعو کې د پولیو ۲۰ پېښې ریکارډ شوې وې.
خېبرپښتونخوا او سندهـ صوبه کې اته، اته پېښې، قبایلي سیمو او بلوچستان کې دوه دوه پېښې رپورټ شوې وې.
د خېبرپښتونخوا په بنو ضلع کې درې پېښې، نوښار، پېښور، هنګو، ډي ائي خان او کوهستان کې یوه یوه پېښه مخې ته راغلې وه.
د سندهـ صوبې سرښار کراچۍ کې یو، شکارپور، سجاول، بدین کې دوه دوه او جېکب اباد کې یوه پېښه ریکارډ شوې وه.
قبایلي سیمه جنوبي وزیرستان کې دوه پېښې او د بلوچستان صوبې په کويټه او قلات ضلعو کې یوه یوه پېښه مخې ته راغلې وه.
پاکستان کې په کال ۲۰۱۵م کې د پولیو ۵۴ پېښې او د هغې نه وړاندې په کال ۲۰۱۴م کې ۳۰۶ پېښې مخې ته راغلې وې.
