لاس رسیدونکی لینک

د پوځي عدالتونو وخت به نور ونه غځول شي، چوهدري نثار


د پوځي عدالتونو په اړوند د چوهدري نثار په حواله په سرکاري کچ کوم بیان مخې ته نه دی راغلی.

د پاکستان د کورنو چارو مرکزي وزیر چوهدري نثارعلي خان د جمعې په ورځ ویلي حکومت داسې کوم پلان نه لري چې د پوځي عدالتونو وخت به نور وغځول شي، په شپږمه جنورۍ د جمعې په ورځ د پوځي عدالتونو دوه کاله موده سرته رسېدلې ده.

ځایي رسنیو د چوهدري نثار علي خان له قوله ویلي (د ترهګرۍ کېسونه به د ترهګرۍ په ضد جوړو عدالتونو ته لېږلی شي او زیاته کړې یې د پوځي عدالتونو د مودې غځولو پلان نه لري)). ولې په دغه اړوند کوم سرکاري بیان مخې ته نه دی راغلی.

پېښور کې د کال ۲۰۱۴م د دسمبر په ۱۶م نېټه آرمي پبلک سکول باندې د ترهګر برید( چې پکې نزدې ۱۵۰ کسان وژل شوي او زیاتره يې د سکول ماشومان ؤ) وروستو د ۲۱م ائيني بدلون لاندې پوځي اېکټ کې بدلون شوی او په ۶م فرورۍ کال ۲۰۱۵م پوځي عدالتونه جوړ کړی شوي وو.

د پارلیمان دواړو اېوانونو په متفقه توګه د پوځي عدالتونو په حق کې رایې ورکړې که څه هم ځینو غړو پرې اندېښنې لرلې.

ځينې راپورونه د سرچینو لخوا وایي چې حکومت په دغه اړوند کار کوي چې دا مسوده نوې کړي ولې د وزیراعظم د بشري حقونو خصوصي مرستیال بېرسټر ظفرالله خان رسنیو ته ویلي (داخله وزارت په خپله په دې کار کوي مونږ سره د دې کوم مالومات نشته).

پوځي عدالتونو د کال ۲۰۱۵م د فرورۍ په میاشت کې کار پېل کړی او ټول ۲۷۵ کېسونه ورته لېږل شوي وو، په دوه کاله موده کې په دغو کېسونو کې د پوځي عدالتونو لخوا ۱۶۱ ترهګرو ته د تېزندۍ سزاګانې اورول شوي او ۱۱۶ته د بندي کېدو سزاګانې ورکړی شوي چې زیاتره يې د عُمر قېد بند دی، او تراوسه پورې یواځې ۱۲ سزاوار تېزندي کړی شوي دي.

د پوځي عدالتونو جوړېدو په ضد ستره محکمه کې خواست هم شوی ؤ ولې عدالت دغه خواست رد کړی ؤ.

وروستو د پوځي عدالتونو فېصلې په ستره محکمه کې چېلنج شوې او ویل شوي چې د سزاوارو کورنۍ د اورېدنې څخه نه دي خبر کړی شوي او نه ورته د دفاع موقع ورکړی شوې ده او په فېصلو يې د سوتره والي نیوکې کړې وې.

ولې د پوځي عدالتونو نه سزاوار شوؤ په اړوند پوځي بیانونو کې ویل شوي چې دغو کسانو د عدالت په وړاندې خپل جرمونه منلي دي.

د پوځي عدالتونو لخوا د القاعده، تحریک طالبان پاکستان، جماعت الاحرار، توحیدالجهاد ډلې، جېش محمد، حرکت الجهادي اسلامي، لشکرجهنګوي، لشکرجهنګوي العالمي، لشکر اسلام او سپاه صحابه غړو ته د ترهګرۍ په کېسونو کې د تېزندۍ سزاګانې اورول شوي دي.

پوځي عدالتونو کې چې د کومو مهمو کېسونو اورېدنه شوې په هغو کې د پېښور آرمي پبلک سکول، کراچۍ کې په صفورا چورنګۍ کې شیعه اسماعلیانو باندې برید، فعالې سبین محمود وژنه، بنو جېل باندې برید، ناګا پربت کې د بهرملکیانو وژنې، اورکزۍ ایجنسۍ کې پوځي هیلي کاپټرباندې برید، پېښور کې په پي ائي ای الوتکه ډزې، د کراچۍ په هوايي ډګر د برید ترڅنګ د ترهګرۍ سره اړونده او امنیتي ادارو باندې د بریدونو مقدمې شامل دي.

پاکستان کې د پوځي عدالتونو په جوړېدو قانون پوهانو او د بشري حقونو د ډلو له لوري نيوکې شوې وې ،او د بشري حقونو ډلو ويلي وو پاکستان کې د وړاندې نه دترهه ګرۍ د مخنيوي عدالتونه موجود دي او پوځي عدالتونو جوړولو ته ضرورت نشته خو د پاکستان حکومت ویلي ؤ چې هيواد يې د غېرمعمولي حالاتو سره مخ دى ځکه د مخنيوي لپاره يې هم غيرمعمولي ګامونو پورته کولو ته اړتيا ده.

XS
SM
MD
LG