ایران د شپږو شتمنو قوتونو د بېړنۍ غونډې رابللو غوښتنه کړې چې د کال ۲۰۱۵م د لوظنامې په اړوند پکې بحث وشي او ایران ادعا کوي چې د امریکې لخوا د بندېزونو غځول د لوظنامې سرغړونه ده.
د ایران سرکاري خبري ادارې ویلي خارجه وزیر محمدجواد ظریف د یورپي یونین د لارې د غونډې رابللو خواست کړی دی، ولې یورپي یونین د خالي په ورځ په دغه اړوند څه نه دي ویلي.
دغه خواست په داسې وخت کې شوی چې د زیارت په ورځ د سپينې ماڼۍ بیان مخې ته راغلی چې کانګرس په ایران د ځينو بندېزونو موده تر لسو کالونو نوره غځوي او دا به د صدر اوباما د لاسلیک نه پرته قانون جوړ شي.
په کال ۲۰۱۵م کې د ملګرو ملتونو د سلامتي کونسل د پينځه مستقل غړو او جرمني سره د ایران د ایټمي پروګرام په سر شوې لوظنامنه کې د بندېزونو لرې کولو ویل شوي وو.
اوباما د ایران ایټمي پروګرام سره اړونده بندېزونه د ۲۰۱۵م د لوظنامې په ترڅ کې لرې کړي ؤ ولې راتلونکي نوي صدر ته پکې دا اجازه پرېښودی شوې وه چې هغه مناسبه وغواړي بندېزونه کارولی شي.
تهران وايي د امریکا د بندېزونو غځول د ۲۰۱۵م کال د لوظنامې سرغړونه ده او روانه اوونۍ یې سائنسدانانو ته ویلي چې په ایټمي قوت چلېدونکې کشتۍ په جوړولو کار پېل کړي.
د امریکا د دواړو ګوندونو مخکښ قانون سازو د روانې میاشتې په سر کې په ایران د بندېزونو غځولو په ترڅ کې د ایران د خفګان پروا نه وه ساتلې او د ایراني صدر حسن روحاني د ځوابي کارروايۍ دړکه يې د پامه غورځولې وه.
حسن روحاني د روانې میاشتې په سر کې ویلي ؤ که چرته امریکا يې په ملک لګېدلي بندېزونه وغځول نو سخت غبرګون به يې مخې ته راشي.
