د پاکستان د پوځ سرلښکر جنرال راحیل شریف نن د ګل/سه شنبې په ورځ نهه ترهګرو ته د تېزندۍ ورکولو د سزا پخلی کړی دی.
په دغو ترهګرو کې په کال ۲۰۱۴م کې د پېښور په باچاخان هوايي ډګر باندې کوزېدونکې د پي آيي ای په الوتکه ډزې کوؤنکی بریدګر هم شامل دی، په الوتکه ډزو کې یوه ښځه وژل شوې او دوه مسافر ژوبل شوي وو.
د پوځ د مطبوعاتي څانګې لخوا په جاري شوي یو بیان کې ویل شوي چې کومو ترهګرو ته د مرګ سزا اورول شوې دوي د ترهګرۍ د پېښو، بې ګناه خلکو په وژنو، لیویز چارواکو نه د سرونو غوڅولو ترڅنګ په پوځ باندې بریدونو کې ککړ وو.
د بیان ترمخه په دغو ترهګرو باندې پوځي عدالتونو کې مقدمې چلول شوي، دوې د عدالت په وړاندې خپل جرمونه منلي دي، او د دغو ترهګرو تعلق د تحریک طالبان پاکستان (ټي ټي پي) او لشکر اسلام ډلو سره دی.
پوځي بیان کې د دغو کسانو پېژندګلو او جرمونو کې د لاس لرلو تفصیل ورکړی شوی دی.
۱: ساجد ولد ابراهیم خان د ټي ټي پي سره تعلق پي آيي ای باندې د برید ترڅنګ عامو خلکو او پولیس باندې حملو کې لاس درلود.
۲: جاوېدخان ولد فقیرګل د ټي ټي پي غړی او امنیتي ځواکونو باندې بریدونو کې ککړ ؤ.
۳: فضل حق ولد شهداد د ټي ټي پي فعاله غړی د څلورو پولیسو تښتولو او د هغوې نه لاسونو غوڅولو کې د ککړتوب سره امنیتي ځواکونو او عامو خلکو باندې بریدونو کې يې لاس درلود.
۴: فضل رحمان ولد فضل کریم د ټي ټي پي فعاله غړی او د پوځي افسر په ګډون د سرتېرو په وژنه کې ککړ ؤ.
۵: زاهدخان ولد کتاب شاه د لشکر اسلام ډلې فعاله غړی او امنیتي ځواکونو باندې وژونکي برید کې يې لاس درلود.
۶: عمرسعید ولد حضرت سعيد د ټي ټي پي سره تعلق او امنیتي سرتېرو باندې بریدونو کې ککړ ؤ.
۷: رحمت ولد اسماعیل خان د لشکر اسلام فعاله غړی او پوځي سرتيرو باندې بریدونه کړي د کوم له امله چې سرتېري وژل شوي دي.
۸: بخت ولي ولد عمل خان د لشکر اسلام غړی او امنیتي سرتېرو باندې بریدونو کې ککړ ؤ.
۹: نزید احمد ولد الله داد د ټي ټي پي فعاله غړی او په پوځ او پولیس باندې بریدونو کې لاس درلود.
د پاکستان د پوځ سرلښکر جنرال راحیل شریف له دې وړاندې هم د څو ترهګرو د تېزندۍ منظوري ورکړې ده. دغو ټولو ترهګرو ته د پوځي عدالتونو لخوا سزاګانې اورول شوي دي.
د کال ۲۰۱۴م په اخرۍ میاشت کې پېښور کې په سکول د برید وروستو په ملک کې پوځي عدالتونه جوړ شوي او د تېزندۍ د سزا عملي کېدو لړې پېل کړی شوې وه، پېښور کې په ارمي پبلک سکول باندې ترهګر برید کې نزدې ۱۵۰ کسان وژل شوي چې زیاتره يې محصلين وو.