د شام په شمالي علاقه کې د ترکي ملاتړ لرونکو جنګیالو او کرد ځواکونو ترمنځ د شنبې یا خالي په ورځ نښته شوې او د هغې وروستو د داعش په ضد عملیات کوؤنکو دوه امریکايي اتحاديانو په خپل منځ کې د جګړې خطره سېوا شوې ده .
د ترکي اناتولیه خبري ادارې ترمخه د کرد ملېشې په یو راکټي برید کې یو ترکي عسکر وژل شوی او درې ژوبل شوي دي .انقر کرد جنګیالي ترهګر ګرځوي .
بل لور ته د امریکې ملاتړ لرونکي د شام ډیموکریټک ځواکونه دریز لري چې د ترکي جنګي الوتکو په پوله پرتې جرابلس کې د کرد ملېشا جنګیالي په نخښه کړي دي چرته چې ترک ځواکونو د چارشنبې یا شورو په ورځ هم برید کړی ؤ .
ولې د خالي په ورځ مخې ته د راغلو خبرونو ترمخه دا علاقه اوس د شامي ډیموکريټک ځواکونو په لاس کې ده . او په سمدستي ډول د کوم ځاني زیان تفصیل مخې ته نه دی راغلی .
د دغو نښتو نه وروستو د لویدیځ د هېوادونو په دغه اړه اندېښنې سېوا شوي چې ترک پوځ په شام کې د داعش د تُندلارو سره کرد ځواکونه هم په نخښه کوي . په شام کې کرد پیپلز پروټیکشن څانګه د (وايي پي جی) په نوم پېژندل کيږي .
امریکا د داعش په ضد جګړه کې وايي پي جي خپل کلک اتحادي ګڼي او ترکي غوښتنه کوي چې وايي پي جی دې په پوله پرته د هغه علاقې نه ووځی کومه چې د داعش د تُندلارو نه نیول شوې ده .
بل لور ته د شام دپاره د ملګرو ملتونو دپاره ځانګړي استازي ویلي د وقتي جنګ بندۍ په صورت کې ملګرو ملتونو په ګېر شوؤ ښارونو کې د انساني خواخوږۍ په سر د امداد رسولو بېړنۍ منصوبه جوړه کړې ده .
د ملګرو ملتونو د دغه منصوبې مقصد حلب ښار کې ګېر په زرګونو کسانو ته امداد رسول او د بجلۍ جوړول دي چرته چې په یو وخت خواوشا ۲۳ لاکه کسان اباد وو .
په برطانیه کې د شام په حالاتو نظر لرونکې د بشري حقونو سازمان ویلي چې د شام د حکومت هیلي کاپټرو د حلب په مشرقي سیمه مادي کې دوه بېرل بمونه ویشتي دي .
ویل کيږي دغه بمونه د حلب سره نزدې د هغه خېمې سره نزدې غورځول شوي چرته چې د زیارت په ورځ یو بېرل حمله کې د ۱۱ ماشومانو په ګډون ۱۵ کسان وژل شوي وو .
د شام حکومت د بېرل بمونو کارولو نه انکار کوي .ولې څیړونکي وايي د حلب دپاسه یواځې د دمشق او ماسکو د ځواکونو هیلي کاپټرې کاریږي .
د خالي په ورځ شامي یاغیان او کورنۍ يې د شام د سیمې نه وتل . دغه پرمختګ هم د زیارت په ورځ د شام د حکومت سره د تړون په پایله کې شوی دی . دا ښار د څلور کالو راهسې ګېر وو او په دغه مهال هوايي بریدونو کې دا تباه شوی دی .
په شام کې د پینځه ؤ کالو د خانه جنګۍ راهسې نزدې پينځه لاکه کسان وژل شوي دي او د یو کروړ ۱۰ لاکه پورې خلک د پناه دپاره نورو ملکونو ته تلي دي .
