د امريکې په اوهائيو رياست کې د يو اماراتي کاروباري تن د داعش د غړي په شک کې د نيولو وروستو د متحده عرب اماراتو حکومت په ملکي خلکو غږ کړی چې د بهر ملکونو د سفر په وخت دې خپلې روايتي جامې نه اغوندي عبايا او بندې دې نه تړي .
د متحده عرب اماراتو د رسنيو ترمخه تېره اونۍ د اماراتو سره تعلق لرونکی يو کس د امريکا د منځني اوهائيو رياست په اېوون ښار کې هغه وخت نيول شوی ؤ چې کله د يو هوټل کارکوؤنکې په ۹۱۱ باندې ټيلي فون وکړو او په مبينه توګه داعش سره اړونده د يو کس په موجودګۍ يې پوليس خبر کړل .
راپورونه وايي فيئر فيلډ ان هوټل کې کار کوؤنکې هغه وخت پوليس ته ټيليفون وکړو چې کله دغه کس په ټيليفون خبرې کولې .
د متحده عرب اماراتو يوې ورځپاڼې د دغه کس عکسونه خپاره کړي چې پکې هغه سپينه عبايا اغوستې ده، پوليسو نيولی په ځمکه يې سمولی، هتکړۍ يې ورته اچولي او بوتلی يې دی .
د متحده عرب اماراتو د بهرنو چارو وزير په ټويټر باندې يو بيان کې په ملکي وګړو د بهرني سفر په وخت او په خصوصي توګه عامو ځايونو کې د خپل حفاظت په موخه د اماراتي جامو نه اغوستو غږ کړی دی .
حکومت په " ښځو هم ټينګار کړی چې د يورپ په ځينو برخو کې د مخ پټولو د بندېز په قانون دې عمل وکړي " د خبردارۍ په بيان کې فرانس، بيليجيئم، ډنمارک او هالېنډ نه علاوه ځيني يورپي ښارونه لکه د سپېن د بارسلونا ښار خصوصي يادګېرنه شوې ده، چرته چې د کال ۲۰۱۰ نه د مخ په پټولو بندېز دی .
د بهرنو چارو وزارت په يو بيان کې ويلي چې د امريکا مرستيال سفير ايتهن ګولدرچ يې غوښتی او د اوهائيو په پېښه يې ورته احتجاج کړی دی .
بيان کې ويل شوي چې متحده عرب امارات د خپلو وګړو حفاظت کوي او د دغه پېښې د وضاحت غوښتنه يې کړې ده .