د خېبرپښتونخوا صوبې سرښار پېښور کې د سيکرټريټ سيکشن افسر نواب صافي د نامعلومو وسله والو په ډزو کې وژل شوی دی .
د پېښور د پوليسو په وينا نواب صافی نن د شورو په ورځ ماښام د روژه ماتي نه وروستو په يکه توت سيمه کې د کور سره نزدې په هدف کړی شوی دی .
راپورونه وايي صافی د ماښام نمانځه له د کور سره نزدې جمات ته ورغلی او د جومات نه په واپسۍ کې پرې وسله والو ډزې کړي دي .
پوليس چارواکو ويلي حمله کوؤنکي د موقعې نه په تېښته کې بريالي شوي او د پېښې په اړه پلټنې پېل کړی شوي دي .
د نواب صافی نزدې شپږ مياشتې وړاندې پېښور سيکرټريټ ته بدلې شوې وه . هغه له دې وړاندې په قبايلي سيمه جنوبي وزيرستان کې د اسټنټ پوليټيکل افسر او اسټنټ پوليټيکل ايجنټ په چوکو پاتې شوی دی .
صافي دوه کاله د جنوبي وزيرستان په لدهه تحصيل کې اسټنټ پوليټيکل ايجنټ او بيا دوه کاله د ايجنسۍ اسټنټ پوليټکل افسر پاتې شوی دی .
د وژل شوي افسر کورنۍ ويلي د چا سره يې کومه شخصي دښمني نه وه .
په سمدستي ډول د پېښې زمه واري چا نه ده قبوله کړې .
د خېبرپښتونخوا په سر ښار پېښور او بېلابيلو سيمو کې د تېرې يوې مودې راهسې د هدفي وژنو لړۍ دوام لري او يو شمېر افسران پکې په هدف شوي دي .