افغان چارواکو وئيلي د هېواد په جنوبي سيمو کې يې د مخالفه وسله والو په ضد عملياتو کې ۲۰ جنګيالي وژلي او په يوه سيمه کې يې په شا تمبولي دي .
د کندوز د پوليسو د مطبوعاتي دفتر مسول هجرت الله اکبري وئيلي نن د ګل په سحر ۱۰ بجې د دشت ارچي په ضلع کې يوې بې پائيلټه الوتکې د وسله والو طالبانو هغه دوه ګاډي په هدف کړي دي کوم چې دوې د کندوز نيولو په وخت په خپله ولقه کې اخستي وو .
اکبري وئيلي په دغه بريد کې دوه ګاډي تباه شوي او پکې سواره ۲۰ وسله وال طالبان وژل شوي دي .
د راپورونو ترمخه کندوز د طالبانو لاسو ته ورتلو په وخت وسله والو يو شمېر ګاډي او وسله هم په خپله ولقه کې اخستې وه .
بل لور ته چارواکو وئيلي د اتوار په ورځ د بغلان صوبې په مرکز پُل خمري کې د امنتي ځواکونو او وسله والو ترمنځ نښته شوې او د سيمې نه يې وسله وال طالبان په شا تمبولي دي .
د نښتې په وخت هغه لويه لار هم تړل شوې وه کومه چې کابل د نورو اته ؤ صوبو او ګاونډي ملکونو سره نښلوي .
چارواکو وئيلي د کاميابو عملياتو نه پس لار پرانستل شوې او وسله والو مخالفينو ته مرګ ژوبله هم اوختې ده .
د طالبانو وياند په يو بيان کې دغه حکومتي دعوې رد کړي او تور يې لګولی چې افغان حکومت د دغه پروپېګنډې د لارې ځانته د اوړېدلي زيان پټولو هڅه کوي .