د ملګرو ملتونو سلامتي کونسل د شمالي کوريا لخوا د تازه ايټمي تجربې نه پس په دغه ملک په نوؤ بندېزونو لګولو کار کوي ، او بل لور ته امريکا او نور نړيوال قوتونه د پيانګ يانګ په دغه ادعا شک کوي چې په ځمکه کې دننه يې د هائيډروجن بم کاميابه تجربه کړې ده .
د سلامتي کونسل د بېړنۍ غونډې نه پس وئيل شوي چې د شمالي کوريا دغه ګام د نړيوال امن دپاره ډاګيزه خطره او د سلامتي کونسل د هغو قراردادونو ښکاره سرغړونه ده ، کوم چې دغه ملک د ايټمي وسلو جوړولو نه منع کوي .
په واشنګټن کې سپينې ماڼۍ په شمالي کوريا نيوکې کړي او وئيلي يي دي چې د دغه چاؤدنې په اړه لمړۍ امريکايي تجزيې د دغه بيان سره سمون نه خوري ، چې شمالي کوريا د هائيډروجن بم ټيکنالوجي ترلاسه کړې ده .
د قامي سلامتي کونسل وياند نېډ پرائس په يو بيان کې وئيلي چې امريکا پرله پسې دا خبره په ډاګه کړې چې هغه به شمالي کوريا د ايټمي قوت په توګه قبول نه کړي .
هغه وئيلي مونږ به په سيمه کې دخپلو اتحاديانو په ګډون د جمهوري کوريا تحفظ او دفاع جاري ساتو، او د شمالي کوريا هرقسمه اشتعال ته به ځواب ورکوؤ.
د ملګرو ملتونو سيکرټري جنرل بان کي مون د دغه ګام سخته غندنه کړې او وئيلي يي دي دغه کار د سيمې سلامتي کمزوری ، او د ايټمي وسلو نه خورولو نړېواله هڅې سختې اغېزمنده کوي .
د شورو په ورځ سحر د شمالي کوريا په سرکاري ټي وي باندې اعلان شوی ؤ چې (مونږ داسې ايټمي رياست جوړ شو چې ورسره هائيډروجن بم هم دی ) . په بيان کې دغه خبرې ته ملکي خپلواکي او دفاع ووئيل شوه .
شمالي کوريا له دې وړاندې په کال ۲۰۰۶م، ۲۰۰۹م او ۲۰۱۳م کې ايټمي تجربې کړي دي .
