د اتوار په ورځ يوه ويډيو خپره شوې چې پکې په مبينه توګه د داعش وسله والو لخوا د پينځه کسانو وژنه ښکاره کولی شي او د دويې په اړه ادعا کيږي چې دويې په شام کې د برطانېې دپاره جاسوسي کوله .
د لسو منټو (دقيقو) په دغه ويډيو کې ښکاره کړی شوي دغه کسان په مبينه توګه د پېسو اخيستو په عوض د شام په شمالي سيمه رقه کې د جاسوسۍ دپاره د فلمونو او عکسونو جوړولو اعتراف کړی دی .
رقه په سويلي شام کې د داعش ډلې لخوا د خپل جوړ خلافت مرکز دی .
په ويډيو کې دغه کسان په نارنجي رنګ جامو کې په زنګونانو کښېنول شوي او په پوځي وردۍ کې وسله په لاس پينځه پټ مخې کسان يې شاته ولاړ ليدل کيږي .
په وسله والو کې يو تن وايي چې دغه د مرګ سزا د برطانيي وزيراعظم ډېوډکېمرون دپاره يو پېغام د ی .
دغه وسله وال کس زياتوي چې " دا څومره د تعجب خبره ده چې مونږ ګورو ستا په شان يو غېر اهم مشر د داعش طاقت چېلنج کوي" . هغه وايي يوه ورځ به داعش ستاسو په ملک حمله اوکړي .
د برطانيې خارجه وزير وئيلي چې هغويې په ويډيو خبر دي اود ويډيو جائزه اخلي .
تُندروه ډلې داعش چې تېر کال د شام او عراق يوه لويه علاقه قبضه کړې او هلته يي خپل خود سره خلافت جوړ کړی دی ، له دې وړاندې يې هم يو شمېر غېرملکيان وژلي دي ، چې پکې د امريکې، جاپان او چين وګړي شامل دي .
امريکا او اتحاديان يې دغه تندروه ډله د نړۍ د امن دپاره خطره ګڼي او په ضد يي عمليات کوي . او روس هم د دغه ډلې په ضد د فضايي عملياتو کولو ادعا کوي .
