د پاکستان سره په پوله د افغانستان په ختيز کې پرتې صوبې ننګرهار ځايي چارواکو وئيلي چې د صدايي خلافت ريډيو يا د خلافت غږ په نوم د داعش د پروپېګنډې دپاره چلېدونکی ريډيو نشريات (خپرونې) يې بندې کړي دي .
د داعش لخوا چلېدونکی دغه ريډيو چې نزدې د يوې مياشتې راهسې يې په ننګرهار کې په پښتو ژبه کې خپرونې پېل کړی شوې وې، د دغه ريډيو خپرونې افغانستان سره په پوله پرتې د پاکستان په قبائيلي سيمو باجوړ او مومند ايجنسۍ سره د خېبرپښتونخوا صوبې په چارسده ضلع کې هم ځايې په ځايې اورېدل شوې .
د داعش د ريډيو خپرونې به په شوا روځ کې د يو نه تر دوه ساعته پورې چلېدې ، او خلکو او په ځانګړې ډول ځوانانو ته بې په دغه ډله کې د شاميلېدو بلنې ورکول کېدې .
د ننګرهار صوبې د ګورنر وياند عطاالله خوګياڼي وايس اف امريکا ته وئيلي چې ځايي چارواکي د دغه نشريانو په بندولو کې کامياب شوي دي ، او زياته کړې يې ده چارواکي په دې لټون کې دي چې د ريډيو نشريات د کوم ځايې نه خپرېدل .
راپورونه وايي د دغه ريډيو په فريکونسۍ باندې اوس ملي نغمې او موسيقي چليږي .
ځينې چارواکو وئيلي چې د دغه ريډيو د خپرونو په بندولو کې امکان دی چې بهرنو ځواکونود افغان چارواکو مرسته کړي وي .
د پاکستان قبائيلي سيمو او چارسدې د ځايي خلکو په وينا د زيارت په ورځ د دغه ريډيو خپرونې نه دي اورېدل شوي .
