لاس رسیدونکی لینک

د خېبرپښتونخوا زلزله ځپلي يخ موسم کډو کولو ته مجبور کړي


د اکتوبر د مياشتې په 26م نېټه راغلې زورورې زلزې د خېبرپښتونخوا سوات، شانګله پار، بره او کوز دير، تورغر، چترال، بونير اوبره کوهستان ضلعې تر ټولو زياتې ځپلې وې .

د پاکستان د خېبرپښتونخوا صوبې د سوات ، شانګلې، براو کوز دير، بونير او چترال ضلعو هغه خلک چې کورونه يې په تېره راغلې زوروره زلزله کې وران شوي وو ، د باران او واورې ورېدو په نتيجه کې د موسم يخېدو له امله زلزله زپلو د سيمو نه کډې کول پېل کړي دي .

د زلزلې نه نزدې يوه اوونۍ پس په ملاکنډ ډويژن کې پرله پسې درې ورځې زورور بارانونه شوي او په غرونو واورې ورېدلې دي . او د زلزلې له امله د اغېزمند شوؤ کورونو غورځېدو په نتيجه کې په سوات، دير او بونير کې د زنانوؤ په ګډون درې کسان مړه شوي او په لسګونو نور کورونه غورځېدلي دي .

د اکتوبر د مياشتې په 26م نېټه راغلې زورورې زلزې د خېبرپښتونخوا سوات، شانګله پار، بره او کوز دير، تورغر، چترال، بونير اوبره کوهستان ضلعې تر ټولو زياتې ځپلې وې .

او د قدرتي افتونو په وخت د انتظام صوبايي ادارې پي ډي اېم ای د شمېرې ترمخه ټوله صوبه کې د زلزلې په نتيجه کې 232 کسان مړه او 1561 ژوبل شوي وو . دغه رنګ زلزلې 81713 کورنه اغېزمند کړي او تباه کړي وو .

د پي ډي اېم ای ترمخه په تباه شوؤ اغېزمند شوؤ کورونو کې يواځې د 1793 زلزله ځپلو سره مرستې شوي دي .

د چارواکو په وينا د صوبې د ملاکنډ ډويژن شانګله ، سوات، بر او کوز دير ترڅنګ چترال ضلعې چې پکې زلزلې زيات کورونه وران کړي او خلک په بيابان پاتې شوی وو، د دويې سره د حکومت لخوا امداد شوی د سر پټولو دپاره ورته ټېنټونه او خوراک ورکړی شوی وو .

خو په دغو غرئيزو سيمو کې د تېر ګل د ورځې راهسې د زيارت د ورځې پورې تېزباران شوی او په غرونو واورې ورېدلي دي ، چې له امله يې موسم سخت يخ شوی دی .

د زلزله ځپلو په وينا دويې نه شي کولی چې په يخ موسم کې ماشومان او زنانه په ټېنټونو کې پاتې کړي،او اوس دوي هڅې کوي چې پنجاب او سندهـ صوبو ته کډې وکړي ، او خپلې کورنۍ هلته وساتي ځکه چې په يخ موسم کې په ټينټ کې وخت تېرول ګران دي .

راپورونه وايي د زلزلې په نتيجه کې اغېزمند شوي په لسګونو نور کورونه د باران له امله غورځېدلي دي ، او په شانګله پار، سوات او نورو سيمو کې په سړکونو کې غرونه راخويدلي لارې يې بندې کړي ، او د زلزلې نه د متاثره علاقو د خلکو ستونزې يې لا نورې سېوا کړي دي .

د خلکو وينا ده چې ډېرو غرئيزو سيمو ته زلزله ځپلو ته امداد نه دی رسېدلی او د لارو د بندېز سره نور ځايي خلک هم د مشکلاتو سره مخ شوي دي .

  • 16x9 Image

    فضل عزیز

    فضل عزیز په کراچۍ ښار کې د ‌‌‌‌‌‌وي او ای ډيوه خبریال دی، د روزانه رپورټونه نه علاوه هغه په ځانګړي موضوعاتو لیکل هم کوي. هغه داردو پوهنتون نه په ژورنلزم کې د ماسټرۍ ‌‌‌‌‌‌ډګري اخستې ده.

XS
SM
MD
LG