لاس رسیدونکی لینک

خودکش حمله کې دپنجاب پښتون داخله وزیر شجاع خانزاده وژل شوی


شجاع خانزاده دیر کې خلکو سره ناست ؤ چې حمله پرې وشوه

د اتوار په ورځ د پاکستان د پنجاب صوبې په کابینه کې شامل د کورنو چارو یوازینی پښتون وزیر شجاع خانزاده په یوه خودکش حمله کې وژل شوی دی .

چارواکي وایي دغه خودکش حمله د پاکستان دخیبرپښتونخوا صوبې سره پیوست د پنجاب صوبې د اټک په شادي خان سیمه کې هاغه مهال شوې کله چې د پنجاب د کورنو چارو وزیر کرنل (ر) شجاع خانزاده پخپله دیره کې د سیمې دخلکو سره ناست ؤ اؤ د خلکو ستونزو یې اوریدلې.

د پنجاب د وزیراعلي مشاور سعید الهي اؤ د اټک د ضلعي روغتون دبیړنۍ څانګې مشر ډاکټر اشفاق احمد دغه خودکش حمله کې د پنجاب د کورنو چارو د وزیر شجاع خانزاده د وژل کیدو پخلی کړی

د راولپنډۍ کمشنر په دغه پیښه کې د اتوؤ کسانو د مړینې پخلی کړی دی.

د پنجاب د قانون وزیر رانا ثناء الله میډیا ته وئیلي د ابتدایي شواهدو له مخې دغه یوه ځانمرګي حمله معلومیږي خو پلټنې روانې دي چې څنګه ځان وژونکی د هغه تر دیرې رسیدلی دی؟

سیمه ایز پولیس وایي د چاودنې له امله د کورنو چارو د وزیر په دیره کې د یوې پراخه کوټې چت په مکمل ډول غورځیدلی اؤ د شجاع خانزاده په ګډون یې ګڼ کسان لاندې کړي دي.

په سیمه کې د مرستې فعالیتونه پیل شوي اؤ مرستندویه ادارې وایي تر دې مهاله یې د ملبې څخه د کورنو چارو د وزیر اؤ یو پولیس افسر یا ډي ایس پي شوکت شاه په ګډون د لسو کسانو مړي اؤ 17 زخمیان راویستي دي .

عیني شاهدین وایي ګڼ نور کسان هم د ملبې لاندې ګیر دي .

دپاکستان د اطلاعاتو مرکزي وزیر پرویز رشید ددغه پيښې د غندنې په ترڅ کې خبریالانو ته وئیلي ددغه رقم بزدلانه کارروائیو له امله ترهګر د پاکستان د حکومت اؤ امنیتي ځواکونو ولولې نه شي ماتولی

هغه وئیلي دي ترهګرو ماتې خوړلې اوس د مقابلې توان نه لري په تیښته دي اؤ دغسې غلچکي بریدونه د هغوئ د وارخطایۍ ثبوت دی خو مونږ به دغه ترهګر کله هم تیښتې ته پرې نه ږدو

د پښتنو د مشهورې قبیلې یوسفرئ سره تعلق لرونکی دوه اویا کلن شجاع خانزاده د پاکستان د پوځ یو پخوانی افسر اؤ د پنجاب په کابینه کې شامل یوازینی پښتون وزیر ؤ اؤ راپورونه وایي هغه ته د تیرې ډيرې مودې راهسې د ترهګرو لخوا د مرګ ګواښونه کیدل..

ښاغلی خانزاده ترلسمه زده کړې د خیبر پښتونخوا په نوښار کې د یو شخصي سکول څخه کړې وې اؤ وروستو یې په کال 1966ء کې د پيښور اسلامیه کالج څخه د ګریجویشن سند ترلاسه کړی ؤ.

هغه په کال 1967ء کې د یو افسر په توګه د پاکستان په فوځ کې شامل شوی اؤ وروستو د کرنل تر عهدې رسیدلی ؤ .

د پوځ څخه د ریټائرډ کیدو وروستو یې سیاست ته مخه کړې وه اؤ په پاکستان کې د کال 2013 په عامو ټاکنو کې له کامیدو وروستو د پنجاب دداخله وزارت قلمدان ور سپارل شوی ؤ

XS
SM
MD
LG