د پاکستان پنجاب صوبې په سر ښار لاهور کې نن د اتوار په ورځ د يو چرچ سره نزدې دوه چاؤدنې شوي چې په نتيجه کې يې لږ تر لږه ۱۴ کسان وژل شوي او د ۷۰ پورې نور ژوبل شوي دي .
د ابتدايي خبرونو ترمخه دغه چاؤدنې د لاهور د عيسايي لږکيو د زياتې ابادۍ والا علاقې يوحنا اباد کې په دوه چرچونو کيتهولک چرچ او کرائسټ چرچ سره نزدې شوي دي، او په دغو چرچونو کې د اتوار په ورځ ډېره گڼه وي .
راپورونه د چارواکو د خلې وايي چې دا دوه ځانمرگي بريدونه شوي دي . او د لاهور د جنرل روغتون چارواکو د ۱۴ کسانو د وژنې پخلی کړی دی .
د روغتون د چارواکو په وينا ژوبلو کې د يو شمېر روغتيايي حالت مرگونی دی .
د تحريک طالبان پاکستان جماعت الاحرار ډلې د چاؤدنو زمه واري په غاړه اخيستې ده .
راپورونه وايي د چاؤدنو په ځايي خلکو دوه مشکوک کسان نيولي دي او وهلي ټکولي دي .
بل لور ته د لاهور په مختلفو علاقو کې د عيسايي لږکيو سره تعلق لرونکو کسانو د دغو چاؤدنو په ضد مظاهرې هم کړي دي .
وزيراعظم نوازشريف د چاؤدنو غندنه کړې او صوبايي حکومت ته يې د کلکو امنيتي گامونو پورته کولو هدايات ورکړي دي .
پاکستان کې له دې وړاندې هم د عيسايي لږکيو په عبادت خانو باندې بريدونه شوي ، چې پکې غټ بريد په کال ۲۰۱۳م کې پېښور کې په سېنټ چرچ باندې دوه ځانمرگو بريدونو ځانونه الوزولي او په دغې پېښه کې ۸۰ کسان وژل شوي او د ۱۰۰ نه زيات نور ژوبل شوي وو .
