لاس رسیدونکی لینک

پنجاب کې د طالبانو د استازانو په ضد د عملياتوغوښتنه


مياافتخار ووئيل ، کوم طالبان چې په پنجاب کې دي هغه په اصل کې د نورو طالبانو استازان دي .

د پاکستان پښتون قام پرسته گوند عوامي نيشنل پارټۍ د حکومت څخه غوښتنه کړې ده ، چې په پنجاب صوبه کې د پاکستاني طالبانو د استازانو په ضد په پراخه کچه چټک عمليات پېل کړي .

دغه غوښتنه د اتوار په ورځ پېښور پرېس کلب کې د اردو ژبې د انقلابي شاعر حبيب جالب په اړه د پاکستاني ژورنالسټ مجاهدبريلوي لخوا ليکل شوي کتاب ٫٫ جالب جالب٬٬ د مخ کتنې دستورې ته د عوامي نيشنل پارټۍ (ای اېن پي ) مرکزي سترسيکترميا افتخارحسېن په خپله وينا کې کړې ده .

مياافتخارحسېن ووئيل دا د بدنصيبۍ خبره ده چې د پاکستان حکمرانه طبقه او اسټبلشمنټ ترهگر د پښتنو په سيمو او په خصوصي توگه قبائيلي سيمو کې لټوي ، ولې حقيقت دا دی چې د طالبانو څومره تنظيمونه او نورې څانگې دي ، او څومره وران کاري دي د هغويې څخه زياتره د پنجاب صوبې دننه فعال دي .

نوموړي زياته کړه کوم طالبان چې په پنجاب کې دي هغه په اصل کې د نورو طالبانو استازان دي .

ميا افتخارحسېن دا هم ووئيل چې په قبائيلي سيمو يا پښتونخوا کې کوم طالب په چا حمله کوي د حملې نه وړاندې هغه پېژندل کيږي ، ځکه چې يا يې لويې وېښته او يا يې لويې گيري وي ، خو په پنجاب کې طالبان دومره فعاله او روزل شوي دي ، چې هغه هلته د پوځيانو په شکل کې هم شتون لري او چې کله ورته د هدف په نخښه کولو ضرورت پېښ شي نو دغه ترهگرهم هغه رنگ شکل اخيتاروي .

نوموړي خپله وينا کې ووئيل چې پېښور کې په آرمي پبلک سکول د شوي بريد نه وروستو دا د خوشحالۍ خبره ده چې ټول قام ، حکومت او پوځي قيادت ته د دې ضرورت پېدا شوی دی چې وس د ترهگرو او وران کارو په ضد په کلکه راپاسېدل د قام په گټه دي او بايد نور په طالبانو کې ښه او بد ونه لټول شي .

مياافتخار زياته کړه چې له دې وړاندې به پاکستان ـ افغانستان خپله پينځمه صوبه گڼله ، خو کله چې پېښور کې په سکول د وران کارو بريد وشو او د پاکستاني پوځ سرلښکر جنرال راحيل شريف افغانستان ته د شهادتونو سره لاړو او افغان حکومت ته يې ووئيل چې په مونږ شوې حمله کې د افغانستان دننه پټ ترهگر لاس لري ، نو افغان حکومت هم د پاکستاني پوځ سرلښکرته داسې ثبوتونه وښودل چې په افغانستان کې څومره وران کاري کيږي جرړې يې په پاکستان کې دي .

او د مياافتخار په وينا دغه رنگ په لمړي ځل پاکستان او افغانستان په دې خبره متفق شوي دي ، چې کوم سړی د پاکستان دښمن دی هغه به د افغانستان دښمن وي ، او دغه رنگ کوم عناصر چې د افغانستان دښمني کوي هغه به د پاکستان دښمن وي .

د ای اېن پي مرکزي سترسيکتر ووئيل ، چې وس بايد دا سوچ پرېښودی شي چې په افغانستان کې په بدامنۍ به پاکستان ، او پاکستان کې په بدامنۍ به افغانستان خپل امن ولټوي . هغه ووئيل افغانستان يو ازاد او خپلواک هېواد دی او نن ټوله نړۍ د افغانستان سره تماسونه نيسي ، افغانستان خپلې ټولې فېصلې په خپله کوي او پاکستان ته هم دا حقيقت منل پکار دي .

مياافتخارد کتاب مخ کتنې دستورې ته په وينا کې ووئيل ، چې حبيب جالب د امن دپاره کار کړی او د عوامي نيشنل پارټۍ نعره هم د امن ده ، خو په دې وطن کې به امن هله په ځايي کيږي چې مونږ د ويرې د دلدل نه راووځو او د ترهگرو مخې ته په نره ودرېږو .

نوموړي ووئيل که نن چرته مونږ د ترهگرو په وړاندې يو موټی نه شو او په نره مو د هغويې مخه ونه نيوله ، نو صبا به هم دغه ترهگرمونږ يو يو ووژني او دغه رنگ به ټول قام د مينځه ځي .

  • 16x9 Image

    فاروق فراق

    فاروق فراق د وي او ای ډیوه خبریال دی، د خبریالۍ څانګه کې د ۲۵ؤ کالو اوږده تجربه لري. د پښتو، ادب، کلتور اؤ تاریخ برخه کې ډیوه راډیو، ټي وي اؤ ویب پاڼې دپاره ځانګړې خپرونې راجوړوي.

     

XS
SM
MD
LG