د پاکستان بلوچستان صوبې سر ښار کوئټې په پښتون اباد سيمه کې نامالومو موټر سائيکل سورو وسله والو د پوليو د ټيم په حفاظت مامور پوليس په ډزو وژلی دی .
د راپورونو ترمخه دغه پېښه د شورو په ورځ رامينځته شوې ده ، او د پوليو د ټيم په حفاظت مامور پوليس زېن الله د نامالومو وسله والو په ډزو کې وژل شوی دی ، او په ډزو کې يو لاروی هم ژوبل شوی دی .
د چارواکو په وينا پوليس والا د پوليو دمخنيوي په مرکز په ډيوټۍ ولاړ ؤ ، چې ډزې پرې شوي ، او حمله کوؤنکي د موقعې څخه په تېښته کې بريالي شوي دي .
پوليس وايي د پېښې پلټنې يې پېل کړي دي ، او په سمدستي توگه د پېښې زمه واري چا په غاړه نه ده اخيستې .
بل لور ته د شورو په ورځ د بلوچستان صوبې چيف سيکرټري په مشرۍ د اعلي کچې يوه غونډه کې د پوليو د مخنيوي کمپائن روان ساتلو پرېکړه شوې ، او وئيل شوي دي د کمپائن په مهال به سيکيورټي نوره زياتولی شي .
له دې وړاندې هم د بلوچستان په گډون د ملک په نورو برخو کې د پوليو په ټيمونو قاتلانه حملې شوي ، د پوليو کارکوؤنکي او ساتونکي پوليس يي پکې وژل شوي دي .
پاکستان د نړۍ په هغو درېو هېوادونو کې دی چرته وس هم د پوليو وائرس شتون لري ، د پاکستان نه علاوه افغانستان او نائيجيريا کې د پوليو جراثيم موجود دي ، ولې د پوليو د نورو ملکونو په پرتله پاکستان کې د پوليو کېسونه زيات مخې ته راځي .
تېر کال پاکستان کې د پوليو د ۳۰۰ نه زيات کېسونه رپورټ شوي وو .
