دپاکستان په قبائيلي سيمه شمالي وزيرستان کې دجمعې په ورځ دجيټ الوتکو بمبارۍ کې لږ ترلږه ٣٠ جنگيالي وژل شوي دي.
دپاکستاني پوځ دمطبوعاتي څانگې ائي ايس پي ار ترمخه دغه کارروائي دشمالي وزيرستان دته خيل علاقه کې دخفيه معلوماتو په اساس شوې ده اؤ وژل شوؤ کې غيرملکي جنگيالي هم شامل دي.
سيمې پورې ميډيا رسد نۀ لري چې له دې امله په ازادانه توگه دشمالي وزيرستان عملياتو کې دواړو خواؤ ته داوښتې مرگ ژوبلې پخلى نۀ شي کيدى.
پوځ دعوه کوي چې دشمالي وزيرستان عملياتو کې تر دې مهاله د١٢٠٠ؤ نه زيات ترهه گر وژل شوي اؤ يواځې ٨٦ؤ پوځيانو په دغو عملياتو کې خپل ژوند دلاسه ورکړى خو طالبان ځان ته داوښتې مرگ ژوبلې ترديد کوي.
دپاکستان پوځ سږکال دجون په ١٥مه وروستو له هغې شمالي وزيرستان کې دملکي اؤ غيرملکي ترهه گرو په ضد عمليات پيل کړل چې يوه اوونۍ دمخه دکراچۍ په هوائي اډه دشوې حملې ذمه واري پاکستاني طالبانو په غاړه واخسته اؤ دپاکستان دحکومت اؤ طالبانو ترمينځ مذاکرات ناکام شول.
دضرب عضب په نوم ددغو عملياتو له امله شمالي وزيرستان نه دلسو لکو نه زياتو خلکو دخيبرپښتونخوا خوندي سيمو ته کډې کړي اؤ اوس هم دکډوالۍ ژوند تيروي.
