لاس رسیدونکی لینک

تازه خبر

پاکستان

دغدارۍ مقدمه کې به په مشرف په لمړۍ جنورۍ فردجرم لگولى شي

 عدالت په مشرف دجنورۍ په لمړۍ نيټه دفردجرم لگولو حکم کړى اؤ په ډاگه کړې يې ده چې دراتلونکې پيشۍ په مهال دې عدالت ته دهغه وړاندې کول باوري کړل شي.
عدالت په مشرف دجنورۍ په لمړۍ نيټه دفردجرم لگولو حکم کړى اؤ په ډاگه کړې يې ده چې دراتلونکې پيشۍ په مهال دې عدالت ته دهغه وړاندې کول باوري کړل شي.
پيښور- دائين دشپږمې مادې لاندې په پخواني پوځي واکمن جنرال پرويز مشرف دغدارۍ دمقدمې چلولو لپاره جوړې کړل شوې ځانگړې محکمې دنهې په ورځ دمقدمې اوريدنه دجنورۍ تر لمړۍ نيټې ځنډولې اؤ مشرف دبمي چاؤدنې داطلاع ترلاسه کولو له ويرې عدالت ته په وړاندې کيدو کې ناکامه شوى دى.
عدالت په مشرف دجنورۍ په لمړۍ نيټه دفردجرم لگولو حکم کړى اؤ په ډاگه کړې يې ده چې دراتلونکې پيشۍ په مهال دې عدالت ته دهغه وړاندې کول باوري کړل شي.
په پخواني پوځي صدر دمقدمې پيل کيدل دنهې په ورځ دامنيتي انديښنو له امله وروستو له هغې وځنډول شول کله چې په هاغه سړک بارود ترلاسه شول چې په کوم چې دمشرف عدالت ته د بوتلل کيدو پروگرام ؤ.
وکيل انور منصور خان ځانگړې محکمې ته وئيلي دي وروستو له هغې چې پوليسو ته پينځه کلو گرامه بارود ترلاسه شول پخوانى جنرال به عدالت ته دوړاندې کيدو جوگه نۀ وي.
ددرې کسيز بينچ مشري کوونکي جسټس فيصل عرب وويل هغه دمشرف دصورتحال په ارزښت پوهيږي اؤ دا چې غداري يو ناقابل ضمانت جرم دى.
هغه دمشرف وکيلانو ته وويل دخپل موکل په ذاتي توگه عدالت ته دوړاندې کيدو څخه داستثنا لپاره دې يو درخواست جمع کړي.
دپخواني صدر وکيلانو د١٤ؤ ورځو لپاره داوريدنې دځنډولو درخواست وکړو چې په دې عدالت وويل دقانون لاندې يواځې اووۀ ورځې ورکولى شو اؤ مشرف ته يواځې نن عدالت ته دوړاندې کيدو څخه استثنا ورکولى شي.
همدغه شان دمشرف سينئر وکيل بيرسټر شريف الدين پيرزاده دمقدمې داوريدنې لپاره دججانو په تعيناتۍ نيوکې وکړې ، خو جسټس عرب وويل دغه شان اعتراضونه بايد په ليکلي ډول جمع کړل شي.
داستغاثې وکيل عدالت ته دمشرف دپيش کيدو دحکم جاري کولو درخواست وکړو اؤ زياته يې کړه چې عدالت ته په وړاندې کيدو کې په ناکامۍ دې دمشرف په ضد ناقابل ضمانت وارنټ جاري کړل شي.
دمشرف يو بل وکيل احمد رضا قصوري په دغه موقع پخپل موکل دترسره دوؤ حملو اؤ داسخباراتي معلوماتو له مخې ديوې بلې ممکنه حملې يادونه وکړه، چې په دې جسټس ياور پخواني صدر ته دنننۍ اوريدنې په مهال دپيش کيدو څخه استثنا ورکړه اؤ عدالت دمقدمې اوريدنه دجنورۍ تر لمړۍ نيټې وځنډوله.
دپاکستان حکومت په ١٧م نومبر په پخواني پوځي واکمن جنرال پرويز مشرف دائين دارټيکل شپږم لاندې دغدارۍ دمقدمې دچلولو اعلان کړى ؤ.
په دغه موقع سخت امنيتي تدابير نيول شوي وؤ.
دعدالت دکمې څخه پخواني دپخواني صدر وکيلانو خبريالانو ته وويل دداخله وزارت له لوري دمکمل تحفظ دورکولو دباور پورې پرويز مشرف عدالت ته نۀ شي وړاندې کيدى.
وکيل احمد رضا قصوري وويل دنهې په ورځ خصوصي عدالت کې دپرويز مشرف له لوري ددغه عدالت په بينچ اؤ وفاق له لوري په مقرر کړل شوې استغاثې داعتراضونو دوه درخواستونه هم جمع کړل شي، کوم چې داوريدنې لپاره منظور کړل شوي دي.
هغه وويل دراتلونکې پيشۍ په مهال به لمړى په دغو درخواستونو بحث کيږي اؤ ترڅو چې دقانون مطابق په دغو درخواستونو فيصله نۀ وي شوي ، دغدارۍ مقدمه نۀ شي پيل کيدى.
دپرويز مشرف له لوري دمقررو کړل شوؤ وکيلانو په ډله کې شامل خالد رانجها دريځ خپل کړو چې دوفاق له لوري مقرر کړل شوې استغاثه جانبداره ده.
دمشرف وکيلان دا دريځ هم لري چې خصوصي عدالت پخواني چيف جسټس افتخار چوهدري اؤ وفاقي حکومت په شفاف انداز کې نۀ ؤ جوړ کړى.

See all News Updates of the Day

ډېره اسماعیل خان: د وسله والو برید کې د کسټم انټیلجنس د یو افسر اؤ څلورو عسکرو په ګډون 7 کسان وژل شوي

د خېبر پښتونخوا په ډیره اسماعیل خا ن سیمه کې نامعلومه وسله والو د کسټم انټیلجنس په ډله برید کړی چې پکې د یو افسر اؤ څلوروعسکرو په ګډون 7 کسان وژل شوي دي.

د ډایریکټوریټ جنرل آف انټیلیجنس اینډ انویسټي ګیشن کسټمز له لوري د خپور شوي بیان له مخې دا پېښه د زیارت - پنجشنبې په ماسپېښن د ډیره اسماعیل خان په رابن روډ ساګو سیمې سره نزدې مخې ته راغلې ده.

بیان کې ویل شوي چې دغلته نامعلومه وسله والو د کسټم په مامورینو ډزې کړي چې پکې د کسټم انټیلجنس یو افسر اؤ څلور عسکر عسکر وژل شوي.

د وژل شوؤ کسانو پېژندګلو د انټیلجنس افسر اسلم خان، حوالدار عنایت خان، اکبر زمان اؤ سپاهیانو افتخار عالم اؤ شهاب علي په نومونو شوې ده.

ډان ورځپاڼې لیکلي چې د وسله والو په ډزو کې یوه ماشومه هم وژل شوې اؤ یو لاروی تن ژوبل شوی ؤ چې هسپتال ته له رسول کېدو وروسته هغه هم مړ شوی دی.

پولیس چارواکو ویلي چې د کسټم وژل شوؤ مامورینو د ډیره اسماعیل اؤ کوټې تر منځ په غځېدلې لویه لاره خپل ماموریت ترسره کولو .

پولیس وایي چې وسله وال له پېښې وروسته تښتېدلي اؤ پولیسو پلټنې پیل کړې دي.

په سمدستي توګه ددې پېښې پړه چا پغاړه نه ده اخستې خو په دې وروستیو کې چې په خېبر پښتونخوا کې په امینتي ځواکونو کوم بریدونه شوي هغې کې د زیاترو پړه وسله والې ډلې ټي ټي پي پغاړه اخستې ده.

د خېبر پښتونخوا وزیر اعلا علي امین ګنډا پور په دې پېښه ژوره خواشیني ښودلې چارواکو ته یې دې پېښه کې د ککړو وسله والو د نیولو امر کړی.

پخپل تعزیتي بیان کې وزیراعلا دا پېښه د خفګان اؤ افسوس وړ بللې ده اؤ د وژل شوؤ کسانو د کورنیو سره یې د خواخوږۍ څرګندونه کړې ده.

تر دې پېښې وړاندې هم وخت په وخت خېبر پښتونخوا صوبه کې د کسټم په مامورینو وسله وال بریدونه شوي چې د کسټم ګڼ شمیر عسکرو پکې خپل ژوند دلاسه ورکړی.

تېر کال په 28م هم د پېښور کلیواله سیمه متنو کې وسله والو دکسټم یا ګمرګ په مامورینو ډزې کړې وې چې پکې څلور مامورین ژوبل شوي ؤو، ددغه پېښې پړه وروسته ټي ټي‌ پي په غاړه اخستې وه.

د قرض پېټی او ګراني - د نړېوال اقتصاد لپاره اندېښنې دي

د آی اېم اېف مشره کرېسټلېنا جارجیو، په واشنګټن کې د پسرلني غونډې پر مهال
د آی اېم اېف مشره کرېسټلېنا جارجیو، په واشنګټن کې د پسرلني غونډې پر مهال

دلته په واشنګټن کې د نړیوالې مالي ادارې آی اېم اېف او نړیوال بېنک د پسرلي ګډې کلنۍ غونډې ته د زیارت/پنجشنبې په ورځ د آی اېم اېف مشرې کرېسټلینا جارجیو ویلي چې نړیوال اقتصاد د سود د لوړې کچې او په اوکراین او غزه کې د جګړو باوجود پرمختګ کړی، خو د پورونو (قرضو) پېټی او ګراني یې د اقتصاد لپاره د اندېښنو په توګه یاد کړي دي.

مېرمن جارجیو وايي چې په نړیواله کچه تولیداتو کې کمي، د کارګرو او ټېکنالوژۍ تر منځ تفاوت، او د زاړه عمر د خلکو زیاتېدلو له امله نړیوال اقتصاد ورو دی.

نوموړې ووېل دا هغه څه دي چې د هغوی پام ورته اوړېدلی دی.

"مونږ څنګه کولای شو چې د تولیداتو او پېداوار دا ورو وده په شا وتمبوو."

د آی اېم اېف د تازه اټکلونو تر مخه نړیوال اقتصاد به په روان کال کې د ۳.۲ فیصده په رفتار روان وي. تېر کال په اکتوبر کې آی اېم اېف د اقتصاد کچه ۲.۹ فیصده پورې ښودې وه.

د اقتصادي ودې اوسنۍ کچه د روانې پېړئ د لومړیو ۱۹ کالو نه کمه ښودل کېږي. د آی اېم اېف د شمېرو تر مخه د ۲۰۰۰ نه تر ۲۰۱۹ پورې د نړیوال اقتصاد کچه ۳.۸ فیصده پورې وه.

مېرمن جارجیو وايي چې په پورونو کې د زیاتوالي علت دا دی چې ډېرو هېوادونو کې حکومتي پورونه ډېر شوي دي. د هغې په وینا تېر کال په عمومي اقتصاد کې د قرضو برخه ۸۳ فیصده وه. د کرونا د وبا وړاندې په ۲۰۱۹ کې دا کچه ۸۴ فیصده وه.

د آی اېم اېف مشرې ویلي چې د امریکا اقتصاد د تمو برخلاف مثبت لور ته تللی دی. هغه وايي چې نوښتونو، د کډوالو په شکل کې د ځوانانو کار ګرانو او د انرژۍ د کمو بیعو له امله د امریکا اقتصاد بهتر کار کړی دی.

د اروپا په اړه مېرمن جارجېو ویلي چې هلته ټېکنالوژۍ هغه شان ګټه نه ده کړې لکه څنګه چې امریکا کې لیدل شوې ده.

کرېسټلینا جارجېو وايي چین له په کار ده چې د اقتصاد د لسیزې زوړ ماډل پرېږدي. هغه وايي د چین بازار کې اخستونکي کم شوي ځکه چې په جایداد (کورونو او سوداګریزو مرکزونو جوړولو) کې زیاتو پانګو ستونزه پېدا کړې ده او وايي پکار ده چین په کور دننه اخستونکي ډېر کړي.

د پاکستان نه افغانستان ته ستانه شوي لکونه افغان ماشومان د لوږې په څېر ناورین سره مخ دي - سیو دې چلډرن

د ماشومانو د پاملرنې نړیوالې ادارې سیو دي چلډرن پخپل یو تازه رپورټ کې ویلي چې پروسږکال د ستمبر میاشتې نه راپدیخوا د پاکستان څخه تر5 لکو اؤ 20 زرو زیات افغان کډوال خپل هیواد ته ستانه شوي دي چې دې کې نیمایي ماشومان دي.

رپورټ وایي دغو ستنو شوؤ زیاتره ماشومانو پاکستان کې سبقونه ویل اؤ مکتبونو ته تلل خو افغانستان ته له ستنېدو وروسته په دې ماشومانو کې 65 فیصدي له مکتبونو بهر دي.

د سیو دي چلډرن سروی کوونکو ویلي دا ستانه شوي زیاتره ماشومان ځکه له مکتبونو بهر پاتې شوي دي چې مکتب کې داخلې لپاره اسناد نه لري.

نظر پوښتنه یا سروی کې دا نه دي ویل شوي چې له کومو ماشومانو پوښتنې شوي هغوي کې نجونې څومره وې؟ ځکه چې د طالبانو حکومت تر شپږم ټولګي پورته د نجونو په زده کړو بندیز لګولی دی.

د اساسي اسانتیاؤ نشتوالي:

د خپلې مور اؤ درېوؤ وروڼو خویندو سره افغانستان ته بېرته ستنې شوې 15کلنې نجلۍ چې اوس د خپل نیکه سره یو ځای وسیږي خپل نوم ونه ښودلو خو سروی کوونکو ته یې ویلي چې له پاکستان څخه تر راوتلو وړاندې هغوي خپل هر څه پلورلي وؤ تر څو افغانستان کې پرې د ځان لپاره اړین توکي لکه جامې، پېزار، کمبلې، دارو درمل واخلي اؤ د خپلې استوګنې لپاره ځای پیدا کړي خو وایي افغانستان کې ډیره یخني ده اؤ دلته ژوند کول ګران دي.

سروې ښیي چې په هرو شپږو کورنیو کې نزدې یوه یې په خیمو کې ژوند کوي او د راستنیدونکو ډیری برخه د ژوند کولو لږه یا هیڅ وسیله نه لري. نزدې نیمایي هغو کسانو چې سروې ته یې ځواب ورکړی، ویلي چې په افغانستان کې دندې نشته.

لوږه د ناورین کچې ته رسېدلې:

دا ارزونه ښیي چې پاکستان نه ستنې شوې 99 فیصدي کورنۍ اؤ افغانستان کې د هغوي کوربه توب کوونکې کورنۍ د خوراکي موادو دومره زېرمې نه لري هغوي پرې خپلې د یوې یا دوؤ میاشتو د خوراک اړتیا پوره کړي.

د ماشومانو د خوندیتوب دا اداره پخپل رپورټ کې وایي چې د خوراک دومره کمی دی چې خپل هیواد ته د ستنو شوؤ کډوالو کوربه کورنیو د خپلو کورنیو په غړو خوراک کم کړی یا یې د خپلو کورنیو سترو غړو ته ویلي دي چې هغوي باید کم خوراک وکړی تر څو ماشومانو ته په اوونۍ کې دوه ورځې خوراک ور ورسیږي.

د سروې پایلې ښیي چې نږدې 40 سلنه ستنې شوې کورنۍ او د دوی کوربانه باید په اوونۍ کې لږترلږه درې ورځې خواړه په پور واخلي، یا په خپلوانو او ملګرو باندې تکیه وکړي ترڅو خپلې خېټې مړې کړي.

په نظر پوښتنه کې د ځواب ویونکو څخه 13 فیصدي کورنۍ اؤ د هغوي 9 فیصدي کوربانه د خوراک د خپلې ورځنۍ اړتیا پوره کولو لپاره په نورو تکیه کوي.

د نظر پوښتنې رپورټ کې په هغو سختو حالاتو اؤ ستونزو رڼا اچول شوې چې د پاکستان نه بېرته ستانه شوي افغان کډوال ورسره مخ دي ، په دې سختو حالاتو اؤ ستونزو کې د څو لسیزو نه روانې جګړې، زلزله، سیلابونه اؤ هیواد کې د وچکالۍ په څېر قدرتي افتونه شامل دي.

رپورټ وایي نزدې 80 لکه ماشومان د ولږې په څېر د ناورین سره مخ دي.

د ملګرو ملتونو د اټکلونو له مخې خوا و شا 16میلینه افغان وګړي د خوراک د کمي د بحراني اؤ بېړنۍ کچې څخه تېریږي.

د سیو دي چلډرن سیمه ییز مشر ارشد ملک وایي د پاکستان څخه افغان کورنۍ یو داسې هیواد ته ستنېږي چې هغه هیڅ نه لري.

هغه وایي افغانستان ته په لویه کچه د کډوالو بېرته ستنېدل په هغو وسایلو اضافي بار دی چې له وړاندې څخه محدود یا کم دي.

ارشد ملک وایي د ناورین سره مخ هیواد (افغانستان) له وړاندې څخه د کډوالۍ د فشارونو سره مخ ؤ چې اوس دې کې د پاکستان نه ورستنې شوې افغان کورنۍ هم ورشامل شوې.

نوموړی ویلي چې تر دې وړاندې پروسکال د ګاونډي هیواد ایران څخه هم قابو شپږ لکه افغان کډوال بېرته افغانستان ته ستانه شوي اؤ ددې سره اوس افغانستان د خپل هیواد دننه د بې کوره خلکو په نړۍ کې تر ټولو ستر دویم هیواد جوړ شوی دی یا داسې هم ویلی شو چې د دې هیواد په مجموعي ابادۍ کې هر اووم تن بې کوره دی.

هغه پاکستان څخه د ستنو شوؤ کډوالو د ستونزو یادونه وکړه اؤ وي ویل قانوني اسناد نه لرونکو افغان ماشومانو کې زیاتره په پاکستان کې زېږیدلي وؤ اؤ هغوي لپاره افغانستان داسې ځای نه دی چې خپل کور ورته ووایي.

د ستونزو یو لامل د طالبانو تګلارې دي:

له هغه وخته چې په 2021م کال کې چې طالبان بیا واک ته رسیدلي، د هېواد اقتصادي او ټولنیز وضعیت مخ په خرابېدو دی. طالبانو تعلیم، کار او عامه ژوند ته د ښځو پر لاسرسي محدودیتونه لګولي دي.

نړیوالې ټولنې تر اوسه د طالبانو حکومت د ښځو پر حقونو د محدودیتونو او نورو لانجمنو تګلارو له امله په رسمیت نه دی پېژندلی. چې له امله یې د اقتصادي پرمختګ لپاره بهرنیو سرچینو ته لاس رسی بند شوی دی.

خو ملګري ملتونه اؤ نور بهرني غیر دولتي سازمانونه افغانستان سره بشري مرستې کوي.

(ایاز ګل، وي او ای نیوز)

ډار: د ایران صدر به اینده هفته د پاکستان دوره کوي

د مارچ د ۲۴ نېټې په دې تصویر کې رییسي لیدل کېږي چې د صدارتي ماڼۍ نه قوم ته خطاب کوي
د مارچ د ۲۴ نېټې په دې تصویر کې رییسي لیدل کېږي چې د صدارتي ماڼۍ نه قوم ته خطاب کوي

د پاکستان خارجه وزیر اسحاق ډار ویلي د ایران صدر ابراهیم رییسي به د وړاندې ټاکل شوي پروګرام سره سم اینده هفته د پاکستان دوره کوي. ایرانی صدر به د پاکستان سفر په داسې حال کې کوي چې په اسرایل د ایران د حملې وروسته په منځني ختیځ کې تاوتریخوالی زیات شوی دی.

ډار د زیارت، پنجشنبې، په ورځ وویل رییسي به د اپرېل په ۲۲ نېټه د دریو ورځو په سفر پاکستان ته ورسېږي.

ډار د ایراني صدر د دورې په اړه نور څه تفصیل شریک نه کړو خو داسې ښکاري چې پاکستان ته د ریيسي تګ د هغو کوښښونو برخه ده چې دواړه ملکونه یې تعلق د ښه کولو دپاره کوي.

د سږ کال د جنورۍ په میاشت کې د دواړو ګاونډیانو تعلقات پس له دې د جنجال ښکار شول چې ایران او پاکستان د یو بل په خاور د مبینه وسله والو خلاف حملې وکړې.

د شخړې وروسته دواړو ملکونو خپل منځو کې د همکارۍ زیاتولو لوظ وکړو.

پاکستان ته د ایراني صدر د دورې په اړه د ډار د اعلان نه څو ورځې مخکې ایران په وړمبي ځل د خپلې خاورې نه په اسرایل د مزایلو او ډرون حمله کړې ده. زیاتره مزایل او ډرون د اسرایل د دفاعي نظام خپله او نورو اتحادي ملکونو تباه کړي دي. اسرایل وايي د حملې جواب به ورکوي.

ایران ویلي د خالي، شنبې، په ورځ په اسرایل یې حمله د اپرېل په وړمبۍ نېټه د شام په سرښار دمشق کې د ایران په کونسلخانې د اسرایل د هوايي حملې په بدل کې کړې. د ایران په سفارتي ودانۍ حمله کې د ایران ځینې لوړ رتبه پوځي چارواکي وژل شوي دي.

پاکستان په هغو ملکونو کې شامل دی چې د فلسطیني ریاست د قیام په مسله د اسرایل سره سفارتي تعلقات نه لري. ډار وویل پاکستان غواړي چې د فلسطینیانو مسله دې د متحده قومونو د قراردادونو په مطابق حل کړی شي.

د پاکستان د خزانې وزیر امریکایي چارواکو سره لېدنه کې ویلي پاکستان امریکې سره خپلې اړېکې لا پراخول غواړي

د پاکستان د خزانې وزير محمد اورنګزيب د جنوبي او مرکزي ايشيا لپاره د امريکې د خارجه وزير مرستيال ډونلډ لو او د امريکې د خارجه وزارت مرستيالې اليزبت هورسټ سره لیدنه کړې چې په دې لیدنه کې امریکایي چارواکو د پاکستان او امريکې د تعلقاتو د لا پیاوړي کولو لپاره د واشنګټن عزم بيا تکرار کړی دی۔

دغه غونډه د چهارشنبې - شورو په ورځ د نړيوال بانک په مرکزي دفتر کې شوې ده چې پکې د پاکستان د خزانې وزیر امريکايي چارواکو ته د پاکستان د اصلاحاتو د ایجنډې په اړه معلومات ورکړي دي.

محمد اورنګزیب ویلي د ټیکسونه لمنه پراخول، د توانایۍ څانګه همواري اؤ نجکاري د پاکستان د حکومت اولیتونه دي.

ډاڼ ورځپاڼه کې د خپور شوي رپورټ له مخې لیدنه کې د متبادلې توانایۍ، زراعت، انفارمیشن ټینکنالوجۍ اؤبو، هوا اؤ د صعنتونو په اړه هم خبرې اترې شوې دي اؤ د پاکستان د خزانې وزیر د پاکستان اؤ امریکې د اقتصادي شراکت دارۍ په تازه کولو هم ټینګار کړی دی.

محمد اورنګزیب ویلي چې د پاکستان حکومت ملک کې د پاییداره اقتصادي ترقۍ اؤ نمو له لړ کې د اصلاحاتو پروګرام ته کلک عزم لري.

اخوا واشنګټن ډي سي کې د پاکستان د اقتصادي پالیسۍ په اړه راجوړ شوي سیمینار ته وینا کې د خزانې وزیر ویلي چې سږکال پاکستان کې د زراعت څانګې غوره کارکردګي ښودلې،ګراني راکمه شوې اؤ د مبادلې کچه باثباته شوې ده.

هغه ویلي چې د پاکستان تجارتي خساره کې کمی مخې ته راځي اؤ د بهر نه ورته د پیسو استول زیات شوي اؤ هم یې اقتصاد کې د ښه والي نښې نښانې لیدل کیږي.

نوموړي ویلي چې پاکستان غواړي د نړیوالې مالیاتي ادارې آي ایم ایف سره یو بل پراخه پروګرام کې شامل شي.

د ايي اېم اېف ترجمان (نې) ای اېف پي ته وویل په موجود وخت کې د ايي اېم اېف توجو پاکستان سره د قرض موجوده پروګرام سرته په رسوولو ده.

تر دې دوه ورځې وړاندې د آي اېم اېف ترجمان (نې) ویلي وؤ د پاکستان نوي حکومت د قرض په نوي پروګرام کې خوښي ښکاره کړې ده او د ادارې عمله تیاره ده چې د نور قرض په پروګرام ابتدايي خبرې وکړي.

د واشنګټن د دورې په مهال د پاکستان د خزانې وزیر په هغو غونډو کې هم شرکت کوي چې د آي اېم اېف او د ورلډ بېنک په کوربتوب هرکال د سپرلي په موسم کې کېږي او د خزانې او ترقۍ وزیران، د اقتصاد دانشوران او شهري حقونو فعالان د نړۍ په اقتصاد بحثونه کوي.

د سږ کال غونډې د نهې، سه شنبې د ورځې نه په رسمي ډول پېل شوي او د نورو ترڅنګ په دوو اهم موضوعاتو به پکې غور کیږي، یوه د موسمي بدلون موضوع ده او بله د نړۍ د مقروضو ملکونو مرسته کول دي.

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00
XS
SM
MD
LG