لاس رسیدونکی لینک

د نيلسن منډيلا په مړينه د نړيوالو مشرانو غمرازي


د صدراوباما په وينا امنناکه اؤ ازاده جنوبي افريقه د نيلسن منډيلا ميراث دى.
پيښور- په ټوله نړۍ کې مهمو حکومتي اؤ مخورو شخصياتو دجنوبي افريقي دپخواني صدر اؤ د نسلي امتياز په ضدد ستر مبازر نيلسن منډيلا په مړينه غمرازي ښودلې ده اؤ په پاکستان کې قومي اسمبلۍ اؤ سينيټ د نيلسن منډيلا په وفات د غمرازۍ قراردادونه منظور کړي دي.
نيلسن منډيلا د ٩٥ کالو په عمر کې پرون د ورپيښې ناروغۍ له امله مړ شوى دى.
په سپينه ماڼۍ کې د امريکا صدر براک اوباما ښاغلى منډيلا يو باهمته، ښه اؤ مبارز انسان ياد کړى اؤ وئيلي دي هغه په شخصي توگه دنيلسن منډيلا څخه زيات متاثره دى.
د صدراوباما په وينا امنناکه اؤ ازاده جنوبي افريقه د نيلسن منډيلا ميراث دى.
دامريکا پخوانو صدرانو جمي کارټر، بل کلنټن اؤ جارج ډبليو بش هم ښاغلى منډيلا د ازادۍ ،انساني وقار اؤ مساواتو علمبردار گرځولى دى.
دملگرو ملتونو عمومي سکتر بان کي مون پخپل پيغام کې وئيلي هغه د نيلسن منډيلا په مړينه سخت غمژن شوى دى.
بان کي مون په خلکو غږ کړى چې هغوئ بايد د جنوبي افريقې ددغه ستر مشر په افکارو د نړۍ د ښه والي دپاره مبارزه وکړي.
د برطانيې وزيراعظم ډېوډ کيمرون ،داسرائيل وزيراعظم بنجمن نيتن ياهو، دپاکستان صدر ممنون حسين ، وزيراعظم ميانوازشريف اؤ دهيټي صدر مائيکل مارټيلى هم نيلسن منډيلا ته د عقيدت پيرزوئنې وړاندې اؤ دهغه مبارزه يې په شاندارو ټکو کې ستائيلې ده.
همدغه شان د جمعې په ورځ دپاکستان په قومي اسمبلۍ اؤ سينيټ کې د نسلي امتياز په ضد د ستر مبارز نيلسن منډيلا په وفات د غمرازۍ قرادادونه منظور شوي اؤ قانون سازانو د هغۀ مبارزې ته پيرزوئنې وړاندې کړي دي.
همدغه شان په ټوله نړۍ کې په سوشل ميډيا خلک د نيلسن منډيلا مبازرې اؤ خدماتو ته د عقيدت پيرزوئني وړاندې کوي اؤ د هغه په مړينه خفگان ښايي
نيلسن منډيلا په ١٨مه جولايي ١٩١٨ د سويلي افريقې په ترانسکي نومې سيمه کې زيږدلى ؤ.
هغه د جنوبي افريقې وړومبى جمهوري صدر ؤ چې د صدارت موده يې د کال ١٩٩٤څخه تر١٩٩٩ وه.
د نسلي توپير په ضد يې يوه اوږده موده نۀ ستړې کيدونکې مبارزه کړې وه دافريقې دملي کانگريس د عسکري څانگې مشر هم پاتې شوى ؤ.
په جنوبي افريقه کې د تور پوستو سره دکيدونکي نسلي توپير په ضد يې يو تاريخي تحريک چلولى ؤ اؤ د جنوبي افريقې محکمو هغه د سول نافرمانۍ،اړي،گړي. امن ته د ضرر رسؤلو اؤ نورو بيلابيلو تورونو په اساس دمشقت دسزا سره زنداني کړى ؤ.
هغه دنسلي توپير په ضد د خپلې مبازرې له امله ٢٧ کاله د رابن په جزيره کې بند تير کړى ؤ خو دبند په دغه دوران کې يې هم خپل تحريک نه لاس نه وؤ اخستي.
په ١١مه فرورۍ ١٩٩٠کې چې کله د اولس په زيات فشار د بند څخه خوشې کړى شو نو د اړي گړي تحريک نه يې لاس پسر کړو اؤ خبرو اترو لاره يې خپله کړه.
په دغه مهال نيلسن منډيلا په دې وتوانيدو چې خلک د نسلي توپير په ضد خپلې مفکورې ته مائله کړي.
دنسلي توپير په ضد دتحريک ختمولو وروستو نيلسن منډيلا ټوله نړۍ کې وستائيل شو اؤ حتي د هغه مخالفين هم د هغه مبارزې ته قائله شول.
په سويلي افريقه کې نيلسن منډيلا د ماډيبا په نوم هم پيژندل کيږي چې دا د مڼديلا کورنۍ دپاره د وياړ يو خطاب دى.
نيلسن منډيلا د خپلې اوږدې مبارزې اؤ اوږد زنداني ژوند له امله نۀ يواځې ټوله افريقه کې دقدر وړ شخصيت بلل کيږي بلکې نړۍ هم د هغه مبارزه اؤ خدمات په زرينو ټکو يادوي همدغه وجه ده چې هر کال ملگري ملتونه د هغه د زيږون ورځ يعنې ١٨جولايي د نيلسن منډيلا د ورځې په توگه نمانځي اؤ په دغه ورځ ټوله نړۍ کې خلک د ښاغلي منډيلا خدماتو ته درناوى وړاندې کوي.
هغه ته د خپلو غوره خدماتو اؤ مبارزې په صله کې د نړۍ په کچ د ٢٥٠ ؤ څخه زياتې جائزې ورکړل شوي چې دامن نوبل انعام هم پکې شامل دى
XS
SM
MD
LG