د امريکې صدر باراک اوباما سره د جمعې په ورځ سپينه ماڼۍ کې د ليدو په مهال د سعودي عرب باچا سلمان د امريکې په ګډون د پينځه غربي طاقتونو د ايران سره د شوي جوهري تړون د ملاتړ کولو څرګندونه کړې ده .
د سپينې ماڼۍ ترمخه دواړو مشرانو " د دې خبرې په ضرورت زور راوړی چې په سيمه کې امن، خوشحالي او ثبات په ځايې وساتلي شي".
سعودي عرب له دې وړاندې د ايران سره په جوهري تړون باندې هم اندېښنې څرګندې کړې وې .
د سعودي عرب د باچا جوړېدو نه پس د شاه سلمان دا د امريکې لمړۍ دوره ده .
د صدراوباما او شاه سلمان ترمينځ دغه خبرې په داسې مهال شوي چې د امريکې په مشرۍ اتحاد په عراق او شام کې د داعش په ضد عمليات کوي ، او د سعودي عرب په مشرۍ اتحاد په يمن کې د ايراني ملاتړ لرونکو حوثيانو ته د ماتې ورکولو هڅې کوي .
سپينې ماڼۍ وئيلي چې امريکې د يمن او شام کې د روانو شخړو په اړه د سعودي عرب د اندېښنو سره اتفاق کړی دی .
مطبوعاتو سره د خبرو نه وړاندې صدر اوباما د سعودي باچا د هغې خواهش ملاتړ کړی چې په يمن کې دې د انساني شخړې د خاتمې دپاره ګډ حکومت جوړ شي .
د امريکې د قامي سلامتۍ مرستيال صلاح کار بن روډس وئيلي دا په مهم وخت کې مهمه دوره ده ځکه چې په سيمه کې يو شمېر بدلونونه روان دي .
د امريکې د خپلې لمړۍ دورې په مهال د سعودي عرب باچا سلمان او صدر باراک اوباما ترمينځ خبرې په داسې مهال شوي ، چې ايران سره د امريکې په ګډون د پينځه غربي طاقتونو لخوا جوهري تړون شوی ، ايران به جوهري وسلې نه جوړوي او په ايران لګېدلي بنديزونه به ختمولی شي .
خو په دغه تړون سعودي عرب اندېښنې څرګندې کړې وې .
بل لور ته په شام او عراق کې د داعش په ضد د امريکې په مشرۍ د اتحاد لخوا عمليات دوام لري .
او په يمن کې د سعودي عرب په مشرۍ اتحاد حوثي ياغيانو ته د ماتې ورکولو هڅه ورکوي ، چاته چې د ايران ملاتړ حاصل دی .