د افغانستان د تخار ولايت (صوبې) په اشکمش اولسوالۍ (ضلع) کې شوې يوه ماين چاؤدنه کې د اولسوال په گډون څلور کسان وژل شوي دي . د تخار صوبې چارواکو وئيلي دغه پېښه نن د اتوار په سحر رامنځته شوې ده .
د تخار د والي وياند سنت الله تيمور د پېښې په اړه وئيلي ، د اشکمش ضلعې مشر عبدالحميد حقجو د ضلعې د مواصلاتو د مشر سره د امنيتې پوستو دوره کوله ، چې په دغه مهال پرې ماين چاؤدنه وشوه ، او په نتيجه کې يې اولسوال ، د مواصلاتو د محکمې مشر او دوه پوليس ووژل شو .
د تيمور په وينا تېره شپه په اولسوالۍ کې وسله والو په امنيتې پوسته بريد کړی ؤ ، چې په شا تمبول شوی ؤ او اولسوال د هغې پوستې دوره کوله چې د چاؤدنې ښکار شو.
بل لور ته کندهار صوبه کې هم د سړک غاړې يو ماين چاؤدنه کې دوه کسان وژل شوي او درې نور ژوبل شوي دي .
د کندهار چارواکي وايي دغه پېښه په خاکرېز اولسوالۍ کې رامنځته شوې او د مسافرو په يو گاډي ماين چاؤدنه شوې او مرگ ژوبله يې اړولې ده .
د دواړو پېښو زمه واري چا په غاړه نه ده اخيستې .
