پاکستان وائي خپل گاونډي هيواد افغانستان کې امن، خوشحالي اؤ ثبات غواړي اؤ دغلته دکومې ځانگړې ډلې ملاتړ نۀ کوي.
دپاکستان دخارجه دفتر وياندې تسنيم اسلم اسلام اباد کې خبريالانو ته داووۀ نيز حال احوال تيرولو په مهال وويل چې پاکستان سيمه کې دپرمختيا لپاره گاونډي هيوادونو سره امن ته ليواله دى.
ديوې پوښتنې په ځواب کې تسنيم اسلم وويل چې کابل کې دنوي حکومت دجوړيدو نه پس دپاکستان اؤ افغانستان ترمينځ اړيکې ژورې اؤ پراخه کيږي.
هغې وويل چې” مونږ دنورو ملکونو په ( داخلي ) چارو کې دعدم مداخلت په تگلاره عمل کوؤ اؤ دنورو هيوادونو څخه هم ددغسې کولو هيله لرو“
. تسنيم اسلم وويل پاکستان گاونډي هيواد افغانستان کې ثبات، امن اؤ خوشحالي غواړي اؤ ددغه هيواد دننه دکومې ځانگړې ډلې ملاتړ نۀ کوي بلکې دهغوي ملاتړ دافغانستان داولس سره دى.
دخارجه دفتر وياندې وويل چې وزيراعظم نواز شريف دافغانستان دپرمختگ په اړه يو مهم کانفرنس کې گډون لپاره لندن کې موجود دى.
دهند اؤ پاکستان ترمينځ دمذاکراتو دبحالۍ په حواله ديوې پوښتنې په ځواب کې تسنيم اسلم وويل چې دې لړ کې ټوله ذمه واري په هند پريوځي اؤ زياته يې کړه چې نوي ډيلي دخارجه سکترانو په کچه ټاکل شوې خبرې په يو اړخيزه توگه منسوخ کړې وې اؤ دې لړ کې يې کوم معقول دليل هم نۀ ؤ وړاندې کړى.
