دافغانستان دننګرهار ولایت د ملي راډیو اؤ ټیلي ویژن په ودانۍ وسله وال برید شوی چې تر دې مهاله دوام لري خو په دغه برید کې د اوختو زیانونو تفصیل لا مخې ته نه دی راغلی.
د چهارشنبې په ورځ د ننګرهار د والي ویاند عطاء الله خوګیاني خبریالانو ته ویلي د سحر په لس نیمو بجو یو شمیر وسله وال په جلال اباد ښار کې د ملي راډیو اؤ ټیلي ويژن ودانۍ ته ننوتي اؤ دغلته ډزې روانې دي.
د والي ویاند په دې هکله نور جذئیات نه دي څرګند کړي خو د سیمې څخه ازادو سرچینو وائس اف امریکه ډیوه ویب پاڼې ته ویلي د ودانۍ دننه د چاودنې یو دروند غږ هم اوریدل شوی.
په سمدستي ډول هیڅ یوې وسله والې ډلې ددغه برید مسولیت په غاړه نه دی اخستی.
سرچینې. وایي د راډیو اؤ ټیلي ويژن د ودانۍ ساحې ته په ګڼ شمیر کې امنیتي ځواکونه رسیدلي اؤ د ودانۍ دننه د ډزو اوازونه اوریدل کیږي.
د ننګرهار د راډیو اؤ ټیلي ویژن وداني په جلال اباد ښار کې د ولایت د مقام سره جوښت موقعیت لري
( ددې خبر نور تفصیلات راروان دي)