لاس رسیدونکی لینک

د امريکې د ملي امنيت صلاح کار پاکستان ته رسېدلی دی


د صدر ډونلډټرمپ د ملي امنيت د صلاح کار جوړېدو وروستو د مک ماسټر د سيمې دا وړومبی سفر دی.

د امریکې د ملي امنيت صلاح کار اېچ ار مک ماسټر به د پاکستان ملکي او پوځي مشرانو سره د امنيت او افغانستان کې د سولې په اړه خبرې کوي.

مک ماسټر د کابل د سفر وروستو نن د دوشنبې په ورځ اسلام اباد ته رسېدلی دی، نوموړي د افغان حکومتي مشرانو سره ليدلي او هلته د موجودو امريکايي ځواکونو د ترهګرۍ ضد حال يې معلوم کړی دی.

د صدر ډونلډټرمپ د ملي امنيت د صلاح کار جوړېدو وروستو د مک ماسټر د سيمې دا وړومبی سفر دی.

د پاکستان سرکاري رسنيو ويلي، وزیراعظم نوازشريف د مک ماسټر سره په ليدنه کې په دې ژمنه ټينګار کړی چې پاکستان سوله ييز ګاونډ غواړي.

وزيراعظم امريکايي چارواکي ته په دغه لړ کې د افغانستان او هند په اړوند د پاکستان لخوا د پورته کړی شوؤ ګامونو حال ويلی دی.

نوازشريف ويلي پاکستان د افغانستان د شخړې د هواري دپاره د نړيوالې ټولنې سره په ګډه کار کولو ته چمتو دی.

د اسلام اباد د سفر نه وړاندې مک ماسټر د روس او پاکستان په شمول په سیمه يیزو هېوادونو غږ کړی چې په جنګ ځپلي افغانستان کې د طالبانو نورې مرستې نه کوي.

مک ماسټر د افغانستان طلوع ټي وي سره په خبرو کې ويليِ،

"مونږ د تېرو څو کلونو راهسې دا طمعه لرو چې پاکستاني مشران به په دې خبره پوهه شي چې په هېواد کې دې د ټولو ډلو پرضد عملیات وکړي. او دا خبره د پاکستان په ګټه کې ده چې په افغانستان او نورو هېوادونو کې د سفارتکارۍ په لار خپله ایجنډا مخکې بوځي، نه چې د تشدد او ترهګرو ډلو د مرستو په ذریعه".

په پاکستان د پخوا راهسې دا تورونه لګي چې د افغان طالبانو مرستې کوي او دويې له يې په خپله خاوره پناه ځایونه ورکړي دي.

پاکستاني چارواکي دغه تورونه ردوي او وايي چې په وروستيو کې يې د افغانستان سره په پوله پرتو علاقو کې په عملياتو کې د ترهګرو ځالې او مرکزونه تباه کړي دي.

اسلام اباد وايي په درځنونو وسله والو د عملياتو نه تښتېدلي، او په وروستيو کې په افغانستان کې د طالبانو لاسو ته ورغلو ضلعو ته تلي دي.

پاکستان او افغانستان دواړه په يو بل دغه ډول تورونه لګوي او دواړه يې رد هم کوي.

XS
SM
MD
LG