لاس رسیدونکی لینک

خېبر او شبقدرکې بريدونه، اته وسله وال او درې عسکر وژل شوي


د مېچنۍ او خواوشا سيمو کې د لټون عمليات روان دي او نزدي د مليشې او نورو عسکري مرکزونو سيکيورټي سخته کړی شوې ده.

د مېچنۍ او خواوشا سيمو کې د لټون عمليات روان دي او نزدي د مليشې او نورو عسکري مرکزونو سيکيورټي سخته کړی شوې ده.

د پاکستاني چارواکو په وينا نن د جمعې په سحر قبايلي سيمه خېبرايجنسۍ کې په پوستو او چارسدې ضلعې په شبقدر سيمه کې د ملېشې ځواک په تربیتي مرکز وسله والو بريدونو کې اته بريد کوونکي وسله وال او درې عسکر وژل شوي دي.

د پاکستان د سرکاري رسنيو ترمخه په خېبرايجنسۍ کې د افغانستان سره د پولې د پورې غاړې نه وسله والو د ملېشې ځواک په پوسته بريدکړی، او ځوابي ډزو کې شپږ بريد کوونکي وژل شوي او په نښته کې د ملېشې دوه سرتيري وژل شوي او څلور نور ژوبل شوي دي.

بله پېښه نن د چارسدې په شبقدر سیمه کې رامنځته شوې او د ملېشې په تربيتي مرکز د دوه ځانمرګو په برید کې يو عسکر وژل شوی او ځوابي ډزو کې بريد کوونکي هم وژل شوي دي.

د دواړو تازه رامنځته شوو پېښو زمه واري د تحريک طالبان پاکستان جماعت الاحرار ډلې منلې او ويلي يې دي دا يي د غازي په نوم عملياتو برخه ده.

د پوځي سرچينو ترمخه نن سحر وختي د خېبر ايجنسۍ د لنډي کوتل لويې شلمان په سپينا څوکه کې وسله والو د اېف سي په پوسته بريد وکړو او په ځوابي ډزو کې شپږ وسله وال ووژل شو.

بل لور ته د چارسدې ضلعې د شبقدرعلاقې، مومندایجنسۍ او پېښور په پوله پرتې مېچنۍ سيمه کې د فرنټيئر کانسټبلري تربيتې مرکز باندې وسله والو بريد کړی دی.

چارواکي وايي دوه ځانمرګو بريد کوونکو تربيتي مرکز ته د ننوتو هڅه کوله، ولې د سرتېرو په ځوابي ډزو کې وسله والو ځان ته چاودنه ورکړه، چې پکې يو عسکر وژل شو او يو څو نور ژوبل شوي دي.

چارواکي وايي د پېښې وروستو د مېچنۍ او خواوشا سيمو کې د لټون عمليات روان دي او نزدي د مليشې او نورو عسکري مرکزونو سيکيورټي سخته کړی شوې ده.

په چارسده ضلع کې تېره میاشت په کچهرو باندې درې ځانمرګي بريد کوونکي هم ورغلي او د پوليس په ځوابي ډزو کې وژل شوي وو.

د افغانستان سره په پوله قبايلي سیمه خېبرايجنسۍ کې د ملېشې په پوسته بريد او د چارسدې او مومندو ترمنځ مېچنۍ کې د ملېشې ځواک په تربيتي مرکز تازه بريدونه په داسې حال کې شوي چې د تېرې مياشتې د ۱۶م نېټې راهسې پاکستان افغانستان سره ټولې لارې تړلي دي.

او د فرورۍ په ۲۲م نېټه په ملک کې د ردالفساد په نوم د وسله والو، شرخوښو په ضد عمليات پېل کړی شوي دي.

افغانستان سره په پوله د لارو تړلو او د ردالفساد عملياتو پرېکړه تېره مياشت په لاهور کې د ځانمرګي بريد او بيا د سندهـ صوبې په سېهون سيمه کې د لال شهباز قلندر په مزار ځانمرګی برید وروستو شوي دي د لعل شهباز په بريد کې د ۹۰ نه زيات کسان پکې وژل شوي او داعش ډلې يې زمه واري منلې وه.

XS
SM
MD
LG