لاس رسیدونکی لینک

"پښتانه دې د ديوال سره ونه لګول شي ګنې باغيان به شي"، پروېزخټک


هغه پوښتنه کړې چې "ولې د پنجاب وزيراعلی شهبازشريف زمونږ نه سېوا پاکستانی دی؟".

د خېبرپښتونخوا صوبې اعلی وزير پروېزخټک ويلي، د پښتنو نه زيات وطن سره مينه لرونکي هيڅوک نشته، او دوي سره څه قسمه امتيازي سلوک به ونه زغمي.

هغه پوښتنه کړې چې "ولې د پنجاب وزيراعلی شهبازشريف زمونږ نه سېوا پاکستانی دی؟".

پروېزخټک خبرداری ورکړی چې "پښتانه دې د ديوال سره ونه لګول شي ګنې باغيان به شي".

د پښتون ويلفيئر ارګنائزېشن دستورې ته په وينا کې پروېزخټک ويلي چې پښتانه پاکستاني دي، او پنجابيان، سندهيان او بلوچان خپل وروڼه ګڼي.

نوموړي د پنجاب حکومت په دغه پرېکړه نيوکه کړې چې پښتانه دې د ځانونو اندراج وکړي، هغه ويلي هغه وخت به ځان رجسټرډ کوو چې کله پنجابيان، سندهيان او بلوچان خپل اندراج کوي.

وزیراعلی خټک ويلي د مسلم ليګ (ن) حکومت پښتنو له د دې سزا ورکوي چې د پاکستان تحريک انصاف ډلې غړي او پلويان دي.

هغه ويلي په خپله به د کورنو چارو وزير ته په پنجاب صوبه کې پښتنو سره د کېدونکې زور زیاتي په اړوند خط ليکي.

نوموړي زیاته کړې چې د پاکستان مسلم ليګ (ن) حکومت په ملک کې د يووالي غږ پورته کوي ولې په حقيقت کې پښتانه بې د څه ګناه نه په جېلونو کې اچوي.

ښاغلي خټک ويلي ترهګرۍ تر ټولو زيات پښتانه ځپلي دي.

نوموړي ويلي چې په ملک کې کله هم ترهګري شوې د ټولو سېوا یې پښتانه دردمند کړي دي .

د خېبرپښتونخوا وزيراعلی پروېز خټک دغه خبرې په داسې حال کې کړي چې په ملک کې د ردالفساد نومې عملياتو پېل کولو سره سم په پنجاب صوبه کې د پوليس لخوا د پښتنو زورولو خبرونه مخې ته راغلي دي.

د فرورۍ په ۲۲م په ټول ملک کې د ردالفساد په نوم عملياتو پېل کولو وروستو د پنجاب صوبې په منډي بهاؤالدين ضلع کې پوليسو يو اعلان کړی ؤ چې که څوک د

"افغان" یا د "پټهان" په څېره کې وینئ نو پولیس ته اطلاع ورکوئ ځکه چې دوي " د خپلو ناپاک عزایمو څخه د ملک په کومه علاقه کې هم ترهګري کولی شي."

له هغې وروستو په لاهور کې سوداګرو پښتنو ته د خپل اندراج کولو ويل شوي او په لویه کچه د پښتنو د نيولو او زورولو خبرونه مخې ته راغلي وو.

پښتنو ملت پاله ګوندونو د پنجاب دغه عمل ته سخت غبرګون ويلی او د خېبرپښتونخوا اسمبلۍ يې په اړوند يو قرارداد منظور کړی ؤ.

له هغې وروستو د پنجاب وزيراعلی شهباز لخوا بيان مخې ته راغلی چې پښتانه يې وروڼه دي، او هغوي سره به امتيازي سلوک نه کیږي.

XS
SM
MD
LG