د پاکستان بلوچستان صوبه کې په یو وسله وال برید کې د یوې شخصي کمپنۍ دوه ساتونکي او امنیتي ځواکونو سره يوه نښته کې دوه مشکوک وسله وال وژل شوي دي.
د چارواکو په وینا د ګوادر ضلعې د پسني په کلانچ علاقه کې وسله والو د چین یوې شخصي کمپنۍ ساتونکو باندې ډزې شوي او دوه ساتونکي يې پکې وژل شوي دي.
د راپورونه ترمخه د چين کمپني په سیمه کې د تیلو او ګېس په لټون کار کوي او دغه کسان د دوي په ساتنه مامور وو چې په وسله وال برید کې ووژل شو.
بلوڅ بېلتون پاله (بلوچ لبرېشن فرنټ) نومې ډلې د دغه برید زمه واري قبوله کړې ده.
بله پېښه د بلوچستان په مستونګ ضلع کې رامنځته شوې او امنیتي ځواکونو د وسله والو سره په نښته کې دوه مشکوک وسله وال وژل شوي او یو نیول شوی دی.
چارواکو ویلي د مستونګ په کانک علاقه کې د امنیتي ځواکونو او وسله والو ترمنځ نښته په داسې مهال شوې چې په سیمه کې ځواکونو د وسله والو د موجودګۍ په خبر عملیات کول.
د چارواکو په وینا نښته کې د وژل شوؤ وسله والو تعلق د لاقانونه ګرځول شوې ډلې لشکرجهنګوي سره دی او نیول شوی تن په کويټه او مستونګ کې هدفي وژنو کې ککړ ؤ.
ناقراره بلوچستان صوبه کې دغه دواړه پېښې د شنبې په ورځ رامنځته شوي دي.
