دافغانستان دپولې ترڅنګ دپاکستان د قبايلي سيمې خېبرايجنسۍ په لرې پرته سيمه تيراه کې ترسره شوې يوه بمي چاودنه کې لږ ترلږه پينځه عسکر ژوبل شوي دي.
دسرچينو ترمخه امنيتي ځواکونه د تيراه په کوکي خيل سيمه کې دتندلارو په ضد په عملياتو بوخت وؤ اؤ پرمختګ يې کولو چې په دغه مهال پرې يوه بمي چاودنه وشوه چې پکې پينځه عسکر ژوبل شوي دي.
په ياده دې وي چې تيره ورځ پاکستاني ځواکونو دخېبرايجنسۍ دلرې پرتې سيمې تيراه په بيلا بيلو علاقو کې دجيټ الوتکو له لارې دترهه ګرو په شکمنو ځالو بمباري کړې وه اؤ ددې ترڅنګ سيمه کې ځمکني عمليات هم ترسره شوي چې پکې تر دې مهاله د١٤ؤ جنګيالو دوژل کيدو او ١١ؤ دژوبل کيدو دعوه شوې ده.
سيمې پورې ميډيا رسد نه لري نو ځکه دغو عملياتو کې دواړو خواؤ ته داوښتې مرګ ژوبله اړه ازادانه پخلى نه شي کيدى.