د پاکستان ۶۵۰ وګړي په شام، عراق، یمن، افغانستان او منځنۍ اسیا په هېوادونو کې د بېلابیلو تنظیمونو سره یو ځاې جنګیږي .
د پاکستان د انګرېزۍ ورځپاڼې ډان په یو راپور کې ویلي چې استخباراتي ادارو په دغو کسانو کې تراوسه پورې د ۱۳۲ پېژندګلو کړې او د دې ترڅنګ يې دا ویره څرګنده کړې چې د نړیوالو ځواکونو د لاسه د ماتې خوړو وروستو ښايي د دوې بیرته په ستنېدو پاکستان کې مذهبي جګړې سېوا شي .
د معلوماتو ترلاسه کولو وروستو د مرکزي حکومت نیشنل کرائسز منېجمنټ سیل (اېن سي اېم سي) نومې ادارې قانون نافذؤنکو ادارو ته خبرداری ورکړی چې د ملک په سرحدونو په خصوصی توګه بلوچستان، خېبرپښتونخوا، ساحلي کنارو او هوايي ډګرونو دې کلک احتیاطي او ګامونه پورته کړي .
راپور د یو امنیتي چارواکي د خلې وايي چې منځني ختیځ، افغانستان او منځني اسیايي هېوادونو کې د ماتې خوړو نه پس پاکستان کې مذهبي تشدد سېوا کېدی شي، ځکه اېن سي اېم سي داخله وزارت ته ويلي چې د دوې د بیرته واپسي مخه دې ونیسي .
چارواکي ویلي ، (اېن سي اېم سي استخباراتي او قانون نافذؤنکو ادارو ته هدایات ورکړي چې بهر هېوادونو د تللو کسانو کورنۍ دې هم د څار لاندې ساتي، کېدی شي د هغوې په واپسۍ امنیت ته خطره ورپېښه شي ) .
د امنییتي ادارو سرچينو ویلو چې افغانستان، منځني ختیځ او منځني اسیايي هېوادونو کې چې کومو بهرنو جنګیالو ته درانه تلفات اوختي دوې به په پاکستان کې پناه واخلي .
( د نورو ملکونو جنګیالي او په خصوصي توګه د منځني اسیايي هېوادونو سره تعلق لرونکو ته افغانستان خوندي ځاې دی ، ولې شام او عراق کې جنګېدونکي به بیرته پاکستان راتلو ته توجه ورکوي ) .
هغه زیاته کړې چې ( زمونږ سیمې ته ستنېدونکي بهرني ترهګر صلاحیت لري چې د پاکستان دپاره خطره رامنځته کړي او افغانستان کې د هغوې زیات قوت هم بې ثباتی جوړولی او قبايلي سیمو پله راتلی شي ) .
راپور د سرچينو لخوا ويلي چې د تجربه لرونکو او تربیه شوؤ سخت دریځو واپسي په ملک کې د وړاندې نه موجوده مذهبي تُندروي نوره سېوا کولی شي .
اېن سي اېم اېس دغه ډول خبرداری د روان کال د جنورۍ په میاشت کې د خېبرپښتونخوا، پنجاب قانون نافذؤنکو ادارو او ملېشې مشر ته ورکړی ؤ چې صوبو ته په داخلېدونکو لارو څارنه زیاته کړي .
راپور کې امنیتي چارواکي ویلي استخباراتي ادارو داسې راپور ورکړی چې بهرني جنګیالي بیرته د ستنېدو پلان لري، دوې په افغانستان کې راټولیږي او منصوبه لري چې د پاکستان او افغانستان په پوله پرته سیمه کې پناه واخلي .
راپورو کې د پاکستان انسټيټیوټ اف پيس سټډيز د چارواکو له خلې ويل شوي چې بهرنو ملکونو کې د بهرنو جنګیالو تنظیمونو سره د جنګېدونکو پاکستانيانو شمېره د ۷۰۰ نه سېوا ده او په نړۍ کې په دوې د سېوا شوې څارنې له امله دوې د بیرته ستنېدو پلان لري .
